The Definitive Guide to Living in the Capital , Cairo , Egypt

عيد الحب قرب، وكل واحد مرتبط بيفكر في حاجة واحدة بس.. الهدية. وبالمناسبة دي، حبينا نلفت النظر لحاجة مهمة جدًا، وهي الهدايا اللي المفروض ماتجيبهاش لحبيبتك في الفلانتين. علشان تبعد عن الكليشيهات والهدايا المتوقعة، وتقدر تفكر في حاجة مختلفة:

1- الورد

لو لوحده يبقى ماينفعش. صدقني مصر كلها بتبقى ماشية بورد أحمر في اليوم ده. حتى اللي مش مصاحب أو مرتبط. انت ممكن لو نسيت تشتري، تاخدلك وردتين من الكابل اللي جنبك. ورد إيفري وير.

2- الدبدوب الأحمر

كفاية بقى، ماشي؟ كفاية. زمان حياتها دلوقتي دبدوب أحمر كبير. ده بقى يتجاب في كل المناسبات: عيد ميلاد،عيد حب، أول يوم اتقابلنا، أول يوم فركشنا. فكفاية بقى ونشوف غيره.

3- البرفيوم

غالبًا يا معلم هي عملت Start up بأزايز البرفيوم اللي عندها، وبدأت تبيع. ده غير اللي هي نفسها بتشتريه.

4- شوكولاتة

على فكرة زميلها في الشغل هتلاقيه جايبلها شوكولاتة، وعامل جو ملزق كده قال يعني بيوجب. فكك من الشوكولاتة، بلاش. وقولها ترجع الشوكولاتة لزميلها.

5- سلسلة حبنا

الحوار ده بطلوه من زمان. جو بقى سلسلة باسمك معاها، وسلسلة باسمها معاك، بقى رخم جدًا. أو جو نص قلب فيه “لا إله إلا الله”، وطبعًا النص التاني فيه “محمد رسول الله”. علشان ده جو أم وابنها، مش اتنين بيحبوا بعض.

6- مج أو خدادية باسمها

هنا لازم نجيبلك مروان يونس بنفسه يقولك “بجد؟”. بلاش تجيب المج اللي عليه اسمها، أو خدادية عليها قلب، جواه اسمها برضه. لأ بلاش.. حقيقي بلاش.

7- صورة كاريكاتير

بوستر الصورة المعمولة كأنها كاريكاتير دي، خليها يوم الفرح على باب القاعة. ده لو كان الحوار ده لسه شغال. إنما في عيد الحب لو جبتلها البوستر ده، هيبقى استرخاص في الحقيقة.

خد وقتك كده وفكر على رواقة، واختار حاجة مناسبة. ده التغير حلو ومطلوب برضه.