Astrotrips نادى هواة الفلك والترحال: رحلات لاستكشاف المجرة في القاهرة
Ahmed Abd El Gawad
جربت قبل كده تبص للسما؟ طب جربت وأنت بـ تبص للسما تشوف النجوم وتفهمها؟ وأنت بـ تقرأ القرآن عدت عليك آيات زى "قُلْ سِيرُوا فِي الْأَرْضِ فَانظُرُوا كَيْفَ بَدَأَ الْخَلْقَ ثُمَّ اللَّهُ يُنشِئُ النَّشْأَةَ الْآخِرَةَ إِنَّ اللَّهَ عَلَى كُلِّ شَيْءٍ قَدِيرٌ" سورة العنكبوت، طب آيات زي "إِنَّ فِي خَلْقِ السَّمَاوَاتِ وَالْأَرْضِ وَاخْتِلَافِ اللَّيْلِ وَالنَّهَارِ لَآَيَاتٍ لِأُولِي الْأَلْبَابِ * الَّذِينَ يَذْكُرُونَ اللَّهَ قِيَاماً وَقُعُوداً وَعَلَى جُنُوبِهِمْ وَيَتَفَكَّرُونَ فِي خَلْقِ السَّمَاوَاتِ وَالْأَرْضِ رَبَّنَا مَا خَلَقْتَ هَذَا بَاطِلاً سُبْحَانَكَ فَقِنَا عَذَابَ النَّارِ" سورة آل عمران.
ده بقى بالضبط اللى هـ يحصل في الرحلة دي، هـ تشوف عظمة ربنا في الكون في السما واللى بـ يحصل فيها، في النجوم والشهب، وكل ده هـ يبقى مع مجموعة من العلماء الشباب المتخصصين في الفلك واللى عاوزين يعرفوا الناس على السما والنجوم والمجرات بشكل مختلف، علشان كده قرروا يعملوا حاجة مختلفة وسموها Astrotrips أو المرصد الفلكي المتنقل.. هما بقى بـ يعملوا إيه؟ تعالوا نقول لكم هما بـ يعملوا نوعين من الرحلات: فلكية وسفاري، الرحلات الفلكية والسفاري بـ يقولوا عليها..
هـ نسافر مع بعض كل شبر في مصر نرصد ونصور ونستكشف ونعيش متعة السفر والترحال، هـ نعمل Hiking وهـ نروح المحميات الطبيعية، وهـ نخيم هناك، هـ نستخدم التليسكوبات، مش مشكلة أنك ما بـ تعرفش تستخدم التليسكوب هـ نعلمك، هـ نستمتع بالطبيعة على الأرض وفي السما هـ نشوف مجرات وسدم وكواكب، هـ نعمل كامب في الصحراء، ندور على بقايا نيازك، هـ نتجنن في حب العلم، في حب السفر في حب الترحال في حب الفلك.
وعلشان تعمل ده لازم تكون هاوى فلك.. هاوى الفلك بـ يقطع مئات الكيلومترات في قلب الصحراء علشان يبعد عن التلوث الضوئي للمدينة ويتكلم مع السما.. يبص ويفهم أن ده كوكب المشترى بأقماره وهو ده كوكب زحل بحلقاته (شايفينه) وهي دى مجرة المرأة المسلسلة وهنا قلب بيتنا مجرة درب التبانة..
هاوى الفلك بـ يمسح صفحة السماء علشان يرصد نيزك أو يصور سديم أو يكتشف كوكب جديد أو يتابع قمر صناعي متحرك.. أو يدعو ربه علشان يشوف نيزك هنا أو هناك.. هو ده هاوى الفلك اللى أخذ من تليسكوبه صديق له يتكلم معاه ويناجيه بالضبط كأنه إنسان بـ يؤنسه في رحلاته، ومن كاميرته حبيبة يغازلها ويحاكيها ليرصد ويصور.
ومن أجمل الحاجات اللى بـ يعملها هواة الفلك أنهم بـ يسافروا إلى أبعد المناطق علشان يتنفسوا هواء نقي ويستمتعوا بالهدوء ويتأملوا في خلق الله، ياااااه أد إيه صغيرة النقطة الزرقاء اللى بـ نسكن فيها.
من هنا كانت مهمة AstroTrips "نادي هواة الفلك والترحال" لنشر الثقافة الجديدة دي وتشجيع الشباب للسفر مش بس لممارسة هواية الرصد الفلكي وإنما للاستمتاع بالطبيعة والتصوير واستكشاف جمال خلق الله من حولنا، هـ نسافر علشان نستكشف ونتعلم ونتعبد ونصور ونريح أعصابنا من زحمة الحياة.
جربوا تشوفوا الكون بعين مختلفة وحياة جديدة وتفكر فى الخلق من وجهة نظر حلوة ومهدئة للأعصاب، تابعوا صفحة Astrotrips على الفيسبوك ومش هـ تندموا.
