The Definitive Guide to Living in the Capital , Cairo , Egypt

لو بتدور على مكان مفيد وممتع تاخد فيه ولادك بعد الامتحانات وتستغل إجازة نصف السنة 2025 بشكل مختلف، يبقى مركز الطفل للحضارة والإبداع في مصر الجديدة اختيار ممتاز. المركز بيقدم أنشطة وورش تعليمية بتشجع الأطفال على التعلم من خلال اللعب والاستكشاف، وبتنمي مهاراتهم في العلوم، التاريخ، والطبيعة بأسلوب ممتع ومبسط. في التجربة دي، ولادك هيتعرفوا على الكواكب، جسم الإنسان، العلماء، وكمان الحضارة المصرية القديمة بشكل يشجعهم يفكروا ويكتشفوا العالم حواليهم.

مركز الطفل للحضارة والإبداع تأسس سنة 1966 وتم تجديده وافتتاحه عام 2022 وموجود داخل حديقة الغابة في مصر الجديدة، وبيتعمل له رحلات متخصصة علشان الطفل يتعرف على العلوم المختلفة، وكمان يتعرف على تاريخ مصر.

بتذكرة سعرها يبأ من 40 جنيه للطفل بتبدأ الجولة مع رحلة هتسافر بأطفالكم لزمان ومكان مختلف، هيقابلوا فيها مجسمات لحيوانات كتير، وكمان فيه مسرح للحفلات ومسرح للعرائس، ومنطقة ألعاب مقسمة للأطفال، ده غير أن ممكن أي حد يعمل فوتوسيشن هناك ولكن بالحجز، وعندهم منطقة للورش الفنية والحرفية، والحديقة بتحتوي على كافيه كبير يساع 100 شخص.

بيضم المركز 5 قاعات للعلوم المختلفة، وخلال 60 دقيقة بيتعرف الطفل على كوكب المريخ و 4 علوم “جغرافيا – جيولوجيا – فيزياء – طبيعة”، ورحلة كوكب المريخ في القاعة الأولى بتكون من خلال شاشة كبيرة بتعرض فيلم تسجيلي عن صعود سفينة فضاء لكوكب المريخ وبيثبتوا من خلال مدة الفيلم أن مفيش إنسان عايش على الكوكب.

أما القاعة الثانية فهتلاقوا فيها مركبة فضائية ويقدر الطفل يصنع واحدة زيها كماكيت وليها جزء خاص بالعجلات الرياضية، والقاعة الثالثة هيتعرف فيها الطفل على لوحة الشرف للعلماء المصريين والأجانب وإنجازاتهم.

وداخل القاعة الرابعة هيتعرف الطفل على الكائنات الحية ومركز الأرض وجسم الإنسان ومعمل العجائب، ومجموعة من العلوم المختلفة وموارد وطاقات الأرض، والقاعة فيها 4 ميكروسكوب بيحلل الطفل من خلالهم عينات من البكتيريا والطحالب اللي بتعالج التربة والهواء والماء.

كمان في القاعة الخامسة هيزور الطفل مجسمين للأرض وفي وسط القاعة هيلاقي ترابيز مستطيلة وملونة فيها 5 فتحات من المخلفات العضوية والورق والقمامة والبلاستيك وبواقي الطعام، وبيجتهد الطفل أنه يقدر يحط كل نوع من القمامة دي في الفتحة المخصصة من الـ5 فتحات.

وداخل مركز الطفل للحضارة والإبداع هتلاقوا كمان متحف مميز بيحكي عن الحضارة المصرية القديمة والنيل والزراعة، وبيكون معاكم مرشد بيشرح كل حاجة، ده غير ألعاب تعليمية ترفيهية مهمة للأطفال علشان تنمية المهارات وكمان اكتشاف قدراتهم وابداعاتهم في مجالات مختلفة.

العنوان: 34 أبو بكر الصديق، هليوبليس.

وتقدروا تعرفوا أكتر عنهم من خلال صفحة الفيسبوك من هنا.