خروجات عيد الفطر 2026 في الشيخ زايد: أفضل أماكن الفسح والمولات والمطاعم للعائلات والشباب
أركان بلازا أماكن ترفيه للأطفال أمريكانا بلازا الشيخ زايد خروجات العيد عيد الفطر فسح القاهرة كافيهات الشيخ زايد مطاعم الشيخ زايد مول العرب
Mohamed Talaat
رمضان بيجري هوا! فجأة لقينا نفسنا في زحمة لبس العيد والتخطيط لخروجة حلوة، مع السؤال اللي بيشغل بال الكل: “هنخرج فين في عيد الفطر 2026؟”. ولأن العيد حلاوته في اللمة، وتغيير الجو مطلوب خصوصًا للي مسافرش بره القاهرة، قررنا في “كايرو 360” نشقلب لك خريطة خروجاتك في الشيخ زايد.
وبدل ما تلف عشوائي، قسمنا لك أماكن زايد حسب “مودك” ومود العيلة، علشان تختاروا الخروجة اللي على مقاسكم بالظبط، وتعيشوا أجواء عيد الفطر 2026 بأحلى طريقة.
أولاً: خروجات “الأدرينالين” والمغامرات “للشباب والأطفال“
لو بتدور على حركة، طاقة، وضحك من القلب، الأماكن دي بتاعتك:
Funtopia مزار مول – الحي 16: مين قال إن النط للأطفال بس؟ دي “Trampoline Park” مجهزة للكبار والصغار، نص ساعة بـ 75 جنيه، والساعة بـ 150 جنيه، الميزة إن المول متكامل، يعني بعد النط تقدر تتغدى في مطعم الأسماك، أو تشتري اللي ناقصك من “سبينس” و”أبو الخير”، أو حتى تعمل شوبينج من Nile Stock.
Escapers أمريكانا بلازا: لو شلتك بتحب الألغاز والتفكير، دي أحدث ألعاب الهروب (Escape Rooms). هتتحبسوا في أوضة ولازم تحلوا الألغاز عشان تخرجوا (السعر حسب العدد)، وبعدها تقدروا تكملوا السهرة بفيلم في سينما IMAX أو تقعدوا في كافيهات البلازا.
كريزي ووتر (Crazy Water) : الكلاسيكية اللي مابتموتش. رغم هدوء الدعاية، المكان شغال من 10 الصبح لـ 6 مساءً، التذكرة بـ 85 جنيه شاملة الألعاب، وفيه جوه مطاعم كتير تسد جوع اللعب.
ثانياً: خروجات – روقان العيلة – “مساحات آمنة للأطفال“
لو معاك أطفال ومحتاج مكان يجروا فيه براحتهم وأنت تشرب قهوتك بمزاج:
Clubliko بالم هيلز: مكان عائلي ممتاز، الأطفال هيعيشوا حياتهم في الرسم، المسرح، تعليم الطبخ، وألعاب الرمل والمياه، الجميل إن عندهم شاشات عرض كبيرة، يعني تقدر تتفرج على الماتشات وأنت مطمن على ولادك بيلعبوا قدام عينك.
ويست تاون هب “بيفرلي هيلز”: عنوان الهدوء والمساحات المفتوحة، منطقة مطاعم وكافيهات راقية، والأطفال يقدروا يجروا بأمان تام، وكمان يقدروا يستمتعوا بمنطقة ألعاب Bubbly الجديدة.
ثالثاً: المولات الشاملة – “الشوبينج واللعب في مكان واحد”
الخيار المضمون اللي بيرضي كل الأذواق:
مول العرب: غول الترفيه في أكتوبر وزايد، هتلاقي هناك كل حاجة: “فوود كورت” ضخمة، مطاعم على النافورة، مناطق ألعاب زي Billy Beez و Spark’s و Shoot IFC. ولو لسه مجبتش لبس العيد، الشوبينج هناك مالوش آخر، وتقدر تختم اليوم بفيلم في سينما جالاكسي.
هايبر وان: المتنفس الأول لزايد وصاحب الذكريات. لسه محتفظ برونقه، فوق هتلاقي Food Court صغيرة وكحك العيد والشوبينج، وتحت تقدر تضرب سينابون أو تشرب قهوتك في سلينترو.
رابعاً: خريطة “المزاج” – تجمعات الكافيهات والمطاعم
زايد بقت عاصمة المطاعم، ودي أبرز المجمعات اللي تروحها وأنت مغمض:
أركان مول: الرقي كله هناك، مطاعم زي Topaz، بلدينا، كراكاس، ومينس برجر، ودايماً هتلاقي Booths بتبيع إكسسوارات ولبس وديكورات شيك جداً.
كابيتال بيزنس بارك: من أمتع الأماكن اللي ممكن تتمشى وتقعد فيها، خصوصاً بعد افتتاح الامتداد الجديد ” Capital Promenade”.
الجزيرة بلازا: الملاذ الأكيد لعشاق “فويجو” و”سينابون”، ومكان ممتاز لمتابعة الماتشات على الشاشات العملاقة مع العيلة.
تجمعات تانية متتفوتش: توين تاورز لمحبي القعدات الشيك.
تيفولي دوم: (أمام أمريكانا بلازا): تنوع مطاعم يرضي الكل.
أتريم بلاز: لو نفسك في Butcher’s Burger.
داون تاون مول: عشان تضرب شاورما “سمسمة” التمام.
Sky Center Ville: تجربة مميزة جنب مستشفى جلوبال كير “متنساش تجرب Avitchii”.
Plaza 34 : هدوء وقعدات مميزة.
أسرة “كايرو 360” بتتمنى لكم إجازة مليانة ضحك، وعيد فطر سعيد عليكم وعلى حبايبكم!
