The Definitive Guide to Living in the Capital , Cairo , Egypt

عمر مراد

لو بتدور على خروجة مختلفة في قلب القاهرة تجمع بين الطبيعة والتاريخ والرومانسية، يبقى حديقة الأسماك في الزمالك اختيار مثالي. المكان ده مش مجرد حديقة، لكنه حكاية بدأت من حلم الخديوي إسماعيل واتحولت لواحدة من أجمل فسح القاهرة، تقدر فيها تستمتع بأنشطة كتير من غير ما تحس بالزحمة أو الملل.

بدأت الحديقة في استقبال زوارها ومحبيها في نوفمبر 1902، ومساحتها مع الحدائق النباتية المجاورة ليها 9 أفدنة، وبتتميز بتصميم مختلف، لأن تكويناتها المعمارية اللي على هيئة خياشيم الأسماك المكونة من الطين الأسوانلي المخلوط بمادة الأسروميل والرمل الأحمر خلاها تحفة فنية.

الحديقة بتضم أكثر من 40 حوض من الأسماك النادرة والمختلفة، وبانوراما عرض الأسماك المحنطة، وكمان فيه حوض كبير للأسماك المفترسة ودي هيستمتع بيها عشاق الأدرينالين.

الحديقة اشتهرت بأنها مكان تجمع العشاق والمحبين علشان كدا اتغنى فيها أغاني غرامية كتير زي  “كان يوم حبك أجمل صدفة” اللي غناها العندليب عبد الحليم حافظ مع فاتن حمامة، ومش بس الأغنية دي، عبد المطلب كمان كان ليه أغنية يا أهل المحبة جواها، واتصور مشاهد غرامية زي مشهد شادية وكمال الشناوي في فيلم عش الغرام.

في كايرو 360 بنرشح لك 5 أنشطة تقدر تعملهم في حديقة الأسماك.

1 – في بداية جولتك داخل الحديقة، تقدر تستمتع بمناظر أحواض الأسماك اللي بتنعكس عليها أشعة الشمس عن طريق فتحات، منظر الأحواض اللي جواها الأسماك الملونة وأشعة الشمس عبارة عن لوحة فنية.

2 – تقدر بعد كدا تتمشى في الحديقة وسط الخضرة والأشجار النادرة. الهواء النقي مع الخضرة قادرين يظبطوا مودك ويحسنوا حالتك المزاجية.

3 – تحت ظلال الأشجار، ومع نسمات الهواء في حديقة الأسماك هتقدر تعبر عن مشاعر حبك لحبيبتك، علشان كدة الحديقة مناسبة للمواعيد الغرامية، والوردة أجمل ما يُقدم للحبيب، علشان كدا تقدر تشتري الورد من منطقة بيع الورد في الحديقة وتكون أجمل هدية لحبيبك.

4 – مش كتير يعرفوا إن تصميم الحديقة المختلف، مع الهواء الطلق اللي بيدخل للجبلاية بيخلي فيه سيمفونية موسيقية (حقيقية) بيصنعها الهواء، يعني هتسمع موسيقى طبيعية ابتكر طريقة عزفها مهندسين متخصصين.

5 – لو خارج مع أسرتك وأولادك، تقدر بعد كدا تاخدهم لمنطقة الألعاب هتلاقوا هناك ألعاب كتير، وبعدين تقدروا تاخدوا مشروبكم المفضل ووجبتكم من المطاعم والكافيهات الموجودة في المكان.