The Definitive Guide to Living in the Capital , Cairo , Egypt

إزاي تروح المتحف المصري الكبير بسهولة؟

مع اقتراب افتتاح المتحف المصري الكبير رسميًا في الجيزة، بقى السؤال اللي على لسان كتير من عشاق الحضارة المصرية سواء مصريين أو سياح هو: إزاي نروح المتحف المصري الكبير؟

المتحف اللي بيعتبر أكبر صرح أثري في العالم، وبيضم آلاف القطع من كنوز مصر القديمة، اتبنى على مساحة ضخمة على طريق القاهرة–الإسكندرية الصحراوي، وبيطل على الأهرامات في مشهد فريد بيجمع بين الماضي والحاضر.

وفي الوقت اللي لسه محطة المترو الخاصة بالمتحف بتجهز للافتتاح، جمعنالك هنا كل الطرق السهلة والمضمونة للوصول للمتحف المصري الكبير سواء راكب مواصلات عامة أو بعربيتك الخاصة.

أولًا: لو هتروح بالمترو

أقرب محطات المترو للمتحف هما الجيزة وفيصل على الخط التاني.

1. انزل في أي محطة منهم.
2. خُد تاكسي أو ميكروباص متجه لميدان الرماية.
3. من هناك هتمشي دقايق قليلة وهتلاقي المتحف قدامك، مبناه الكبير بيبان من بعيد جدًا.

ثانيًا: لو جاى من وسط البلد أو محطة رمسيس أو أكتوبر

لو أنت في وسط القاهرة أو جاي من محطة مصر برمسيس:

1. هتلاقي ميكروباصات رايحة ميدان الرماية من رمسيس، وميدان الجيزة، وموجودة كمان في ميدان الحصري في 6 أكتوبر.
2. كل الخطوط دي بتعدي على ميدان الرماية، وهو أقرب نقطة للمتحف.
3. من الميدان، تمشي خطوتين أو تركب تاكسي صغير لبوابة المتحف.

ثالثًا: لو رايح بعربيتك الخاصة

لو سايق عربيتك، فأسهل طريق هو طريق القاهرة–الإسكندرية الصحراوي باتجاه الأهرامات.

المتحف موجود قبل الأهرامات بحوالي 2 كيلومتر، والمكان فيه موقف سيارات كبير ومجهز للزوار، وكمان لافتات واضحة من الطريق الدائري بتدلك على الاتجاه الصحيح.

رابعًا: نصائح هتسهل وصولك للمتحف المصري الكبير 2025

قبل ما تتحرك في طريقك للمتحف المصري الكبير، خُد بالك من شوية تفاصيل بسيطة ممكن تفرق جدًا في تجربتك:

اختار الوقت الصح

الزحمة على طريق الهرم والرماية بتكون أقل في الصبح بدري من 8 لـ10، وبتزيد شوية بعد الظهر خصوصًا أيام الخميس والجمعة. لو ناوي تروح بالعربية، يفضل تطلع بدري وتستفيد من الجو الهادئ والطريق الفاضي.

أفضل أيام الزيارة

لو ناوي تزور في نهاية الأسبوع، ودي أكثر أيام المتحف هيكون فيها زحمة، حاول تروح يوم الجمعة الصبح أو السبت قبل الظهر. أما الأيام العادية فـ الثلاثاء والأربعاء عادة بيكونوا أهدى في المرور.

استخدم تطبيقات الملاحة

قبل ما تتحرك، افتح Google Maps أو Waze وشوف أسرع طريق وقتها، لأن فيه أكتر من طريق بيوصل للمتحف زي طريق الفيوم أو الدائري أو شارع الهرم. التطبيق كمان هيعرّفك الطرق اللي فيها أعمال أو تحويلات.

أماكن الركن

المتحف مجهز بموقف سيارات واسع وآمن للزوار، بس لو رايح في وقت الزروة، خُد بالك إن الانتظار ممكن ياخد وقت بسيط، فاحسب ده ضمن رحلتك.

لو راكب مواصلات عامة

اختار الميكروباصات أو الأتوبيسات اللي رايحة ميدان الرماية لأنها الأقرب لبوابة المتحف. وفي الزحمة، التاكسي أو أوبر ممكن يكون خيار أسرع لو كنت قريب من الجيزة أو فيصل.

تجنب ساعات الذروة

المرور بيكون في أقصى ازدحامه ما بين 2 الظهر لـ5 المغرب، خصوصًا في طريق الهرم والدائري. حاول تخطط رحلتك قبل التوقيت ده.

استعد لمحطة المترو الجديدة

محطة المتحف المصري الكبير على الخط الرابع لسه تحت الإنشاء، لكنها هتختصر وقت الرحلة جدًا قريبًا. فتابع أخبار تشغيلها لو ناوي تزور المتحف الفترة الجاية.

إزاي تروح المتحف المصري الكبير من منطقتك؟

من المهندسين: خُد طريق جامعة القاهرة أو كوبري فيصل لحد ميدان الرماية، ومن هناك هتلاقي المتحف على بُعد دقايق.

من مصر الجديدة أو مدينة نصر: أسهل طريق هو النزول على الدائري، واتجاهك ناحية المنيب، ثم مخرج طريق الأهرامات – هتلاقي لافتة للمتحف.

من المعادي: خُد الطريق الدائري واطلع من مخرج الأهرامات أو طريق الفيوم، وكمل لحد ميدان الرماية.

من 6 أكتوبر: الطريق بسيط جدًا، على طول محور 26 يوليو ثم طريق الواحات أو طريق الفيوم لحد ميدان الرماية، والمتحف قريب جدًا من الميدان.

من الدقي أو العجوزة: استخدم شارع التحرير أو كوبري الجامعة باتجاه الجيزة، ثم كمل على شارع الهرم أو فيصل لحد ميدان الرماية.

وأخيرًا..

الوصول للمتحف المصري الكبير أسهل مما تتخيل. سواء جاي من شرق القاهرة، غربها، أو حتى من الجيزة نفسها، الطريق واضح والمواصلات متوفرة.

زور المتحف واستمتع بتجربة فريدة وسط كنوز مصر اللي العالم كله مستني يشوفها، في أكبر متحف أثري في التاريخ الحديث.