The Definitive Guide to Living in the Capital , Cairo , Egypt

في وسط الزحمة والاختيارات الكتير لتطبيقات المواصلات في القاهرة، بدأ يظهر اسم لندن كاب كخدمة مختلفة تمامًا، مش بس لأنها بتقدم رفاهية عالية، لكن كمان لأنها بتعتمد على سيارات كهربا فخمة زي اللي موجودة في لندن، وده بيخلي التجربة نفسها جزء مهم من الرحلة. لو بتفكر في وسيلة نقل تكون محترمة، مريحة، ومناسبة للمشاوير المهمة أو الخروجات الخاصة، لندن كاب بقى من أقوى الاختيارات. في كايرو360 جربنا الخدمة وهنحكيلكم بالتفصيل كل حاجة: إزاي تحجز، الأسعار عاملة إزاي، مميزات الخدمة، وهل فعلًا تستاهل التجربة ولا لأ.

البداية تقدروا تحجزوا من التطبيق أو الويب سايت وكمان من خلال الكول سنتر، ودي ميزة مش موجودة في أي تطبيق تاني، وهما عندهم أكتر من فئة في السيارات واحنا هنتكلم عن فئة E الأقل سعرًا،  ومن خلال التطبيق والويب سايت بتحددوا نقطة الالتقاء اللي موجوين فيها اوتوماتيك ولكن لو هتطلبوا عن طريق الكول سنتر هتحددوا نقطة شهيرة لكم علشان تطلبوا، وخلوا بالكم هو بيشتغل على الشوارع الرئيسية فقط مش بيدخلوا متفرعات ولا شوارع جانبية.

ما يفوتكش كمان: تطبيق رابيت – Rabbit: أسهل طريقة تتحرك بسكوتر كهربائي وتهرب من زحمة القاهرة

حاليا لندن كاب عندهم خدمة اشتراك برو، وده بيديكم مميزات إضافية في الانتظار وتثبيت سعر الرحلة والإلغاء وضعف برنامج النقاط، وكمان أسعار خاصة وبيكون سعره 400 جنيه شهريًا، وطبعًا ده بيكون مفيد للمستخدم المستمر.

فتحنا التطبيق وقررنا نختار رحلة صغيرة علشان نقدر نعرف الأسعار وكان الرحلة من شارع مصدق بالدقي حتى ميدان التحرير في وسط القاهرة، وفئة E المحددة لو هتكون الرحلة اتجاه واحد سعرها 640 جنيه، ولو الرحلة هتطلبوها ساعتين سعرها 3500 جنيه، و4 ساعات، 4800 جنيه، وبالنسبة لرحلة 6 ساعات فالسعر 5780 جنيه، وأخيرا الرحلة 8 ساعات بـ7465 جنيه.

تقدروا تطلبوا رحلة فورية أو تحددوا وقت مستقبلي للرحلة، وبيتم تحديد السائق حسب التوفر في المنطقة اللي بتطلبوا منها وبيظهر اسمه وصورته ورقم الهاتف الخاص به، وتقدروا تتواصلوا معاه بشكل مباشر.

من مميزات لندن كاب أنها سيارات كهرباء فخمة زي اللي موجودة في بريطانيا، وممنوع ركوب أي شخص بجانب السائق وهما مخصصين المكان ده لو معاكم شنط وخلافه تكون بجواره وكمان تقدروا تستخدموا الشنطة الخلفية لو محتاجينها وتوتال الشنط اللي تقدروا تاخدوها معاكم 3 شنط متوسطة، وخلف السائق فيه كرسيين منفصلين، والمقابل لهم بالخلف كنبة، والمساحة الخلفية واسعة جدًا تقدروا تستخدموها لحد 6 أفراد، وكمان هتكونوا مرتاحين ومبسوطين.

من أهم ممزيات لندن كاب أنها مجهزة كمان لذوي الهمم وتقدروا تطلبوا ده عند طلب الرحلة، وهما بيقدموا 10 دقائق انتظار في الرحلة العادية مجانًا وبعد كده كل رحلة الدقيقة بـ7 جنيه، وفي المطار بيكون الانتظار المجاني 45 دقيقة مجانًا وكل دقيقة زيادة سعرها 10 جنيه.

التجربة الخاصة بلندن كاب هتكون ممتعة وهتخليكم تنبسطوا وتستمتعوا بكل دقيقة معاهم لأنهم بيقدموا خدمة ممتازة بتعتمد على رضاء العميل أولًا، وهما بيشجعوا الطلب من التطبيق وبيقدموا خصم 30% للاستخدام أول مرة، وكمان خدمة العملاء شغالة عندهم 24 ساعة.

بشكل عام خدمات لندن كاب للناس اللي حابة تجربة Vip خاصة أن الأسعار مش في متناول الجميع، واحنا بنرشحهم لو رايحين ديت هيكون لفتة متميزة لكم ولو جربتم الخدمة عرفونا تجربتكم معاهم ولو مجربتوش لازم تجربوهم، لان المميزات عندهم مختلفة ومتميزة، وتقدروا تعرفوا أكتر عنهم من خلال صفحتهم على فيسبوك من هنا.