The Definitive Guide to Living in the Capital , Cairo , Egypt

من فترة للثانية بنلاقي مبادرة تدعم البنات والستات أنهم يعبروا عن نفسهم ويتكلموا، وبرغم المبادرات الكتير إلا إن مش دايما بتقدر أو بتعرف البنت تعبر عن مشكلاتها ومشاعرها بوضوح خاصة وسط مجتمع بيعتبر تعبير البنت بحرية عن رأيها عيب وغلط، فكان لازم تظهر مبادرة تعلم البنات إزاي يصوروا ويعرضوا همومهم ومشاكلهم.

ومن هنا ظهرت فكرة ريز يو فويس “Raise your Voice” واللي بتعمل ورش تصوير ومونتاج للبنات وتساعدهم يعرضوا أفلامهم في المهرجانات.  الفكرة بدأت مع اهتمام أحد مؤسسي “Raise your Voice” فرانشيسكا واللي من أصول ألمانيا مكسيكية وحبت أنها تعمل حاجة خاصة بالمرأة تساعدها أنها توصل صوتها بحرية، خاصة لأنها أول ما نزلت مصر في 2014 وكانت بتدور على ناس تساعدها في تصوير أفلام وثائقية عن قضايا المرأة واتفاجأت أن أغلب اللي قدموا ذكور وأن مافيش بنات كتير في المجال ده.

فقررت أنها تعمل كيان يساعد البنات والسيدات أنها تتعلم إزاي تصور وتمتنج وتحكي قصتها بحرية، علشان ماحدش يفرض وجهة نظره على قضية بالأساس ماحدش هيعرف يوصلها بصدق غير صاحبة القصة دي.

علشان الفكرة تستمر كان لازم يكون فيه منصة يتعرض عليها الأفلام وده اللي تم من خلال دعم المتحف الرقمي للنساء أو ” digital museum of women ” واللي بيعرض كل الأفلام الخاصة بالفتيات.

“Raise your Voice” بيقدم ورش مجانية للبنات، وقدر بالفعل أنه يخرج أكثر من دفعة للبنات، عملوا أفلام كتير  تقدروا تعرفوا عن الأفلام أكتر من موقعهم هنا، ده غير صفحتهم على الفيسبوك اللي عليها كل أخبارهم.

المكان لسه مستمر وبيدعم أي فتاة او سيدة نفسها تتعلم إزاي توصل قضيتها في المجتمع بأسلوب سهل وبسيط.