The Definitive Guide to Living in the Capital , Cairo , Egypt

الصور: المقاولون العرب

لو بتعدي كتير من على محور روض الفرج أو شوفت كوبري تحيا مصر من بعيد وافتكرت إنه مجرد طريق سريع، فالحقيقة إن اللي تحت رجليك أكبر وأعقد وأهم بكتير. المشروع ده واحد من أضخم مشروعات الطرق في مصر، واتعمل علشان ينقل الكثافات المرورية من شرق القاهرة لطريق إسكندرية الصحراوي ومطروح والعلمين من غير ما تدخل قلب العاصمة. في السطور الجاية، ومن خلال صور بتقربك من التفاصيل، بنحكيلك معلومات وأرقام عن المكان ممكن تكون أول مرة تعرفها.

محور روض الفرج مش مجرد كوبري واحد، ده مشروع طرق متكامل بيبدأ من ترعة الإسماعيلية، ويعدي على منطقة شبرا المظلات، ويوصل لحد غرب الطريق الدائري في اتجاه طريق إسكندرية الصحراوي عند الكيلو 39، وفي قلب الرحلة دي بيعبر نهر النيل.

المشروع اتصمم علشان يشيل ضغط مروري ضخم جاي من شرق القاهرة، ويوزعه بسلاسة من غير ما العربيات تدخل وسط البلد. علشان كده، المحور فيه شبكة مطالع ومنازل كبيرة، ستة مطالع ومنازل في منطقة المظلات، وثمانية مطالع ومنازل عند الطريق الدائري.

وأنت معدي فوق النيل، غالبًا مش واخد بالك إنك بتمر فوق كوبريين مختلفين. كوبري النيل الغربي طوله حوالي 400 متر، وعرضه 50 متر، وارتفاعه عن سطح الميه 14 متر، والفتحة الملاحية فيه 120 متر، وده بيخلي مرور الفنادق العائمة تحت الكوبري ممكن من غير أي مشكلة.

أما كوبري النيل الشرقي، فده حكاية تانية خالص. الكوبري ده ملجم، يعني معتمد على كابلات حاملة، واتسجل في موسوعة جينيس كأعرض كوبري ملجم في العالم بعرض 67.3 متر. مش بس كده، ده كمان فيه أكبر فتحة ملاحية على نهر النيل بعرض 300 متر، وأعمدة واصلة لارتفاع 100 متر، وبيستحمل أوزان تقيلة جدًا لحد 120 طن.

الأرقام هنا بتشرح قد إيه المشروع ده ضخم. الطول الإجمالي للمحور، شامل الكباري والمطالع والمنازل، حوالي 12 كيلومتر. اتستخدم فيه حوالي مليون متر مكعب خرسانة، و280 ألف طن حديد. تحت الأرض، فيه 6004 خازوق بأقطار بتبدأ من 80 سم وتوصل لحد 2 متر، شايلين 432 قاعدة، فوقهم 1908 عمود.

فوق الأعمدة دي، اتنفذ 432 كمرة عرضية، و2830 كمرة سابقة الصب، غير الهيكل المعدني العلوي لكوبري النيل الشرقي اللي وزنه لوحده 7000 طن، وكابلات حاملة بإجمالي 1500 طن. كمان فيه 11 باكية معدنية أطوالها بتتراوح ما بين 32 و62 متر، بإجمالي وزن حوالي 15 ألف طن.

الضخامة دي ما راحتش من غير تقدير. المشروع حصل على جائزة أفضل مشروع من بين سبعة مشروعات على مستوى الشرق الأوسط سنة 2020 من MEED، وكمان دخل موسوعة جينيس سنة 2019 كأعرض كوبري ملجم في العالم في فئة الأرقام القياسية الهندسية.

وأنت بتتفرج على الصور عن قرب، حاول تفتكر إن المكان ده مش بس طريق بتعدي عليه، ده مشروع هندسي اتعمل علشان يغير خريطة الحركة في القاهرة، ويربط الشرق بالغرب، وفوق كل ده، يسجل اسم مصر في أرقام قياسية عالمية.