The Definitive Guide to Living in the Capital , Cairo , Egypt

الإعلام الدولي متفق على إن المتحف المصري الكبير مشروع ضخم يليق فعلًا بحضارة عمرها آلاف السنين. وده اللي ظهر بوضوح في تقرير حديث نشرته صحيفة The Times البريطانية، اللي وصفت المتحف بأنه “الهرم الرابع”، واعتبرته واحد من أهم وأبهر الإنجازات الثقافية والمعمارية الحديثة في العالم. التقرير شاف إن المتحف مش مجرد مكان لعرض الآثار، لكنه تجربة كاملة بتقدم حضارة قدماء المصريين بشكل جديد ومختلف للعالم كله، بداية من تمثال رمسيس الثاني العملاق، لحد كنوز توت عنخ آمون اللي بتتعرض كاملة لأول مرة في التاريخ.

وبحسب التقرير، فالمتحف المصري الكبير أصبح صرح معماري ضخم بتكلفة وصلت لـ 1.2 مليار دولار، وبتصميم هندسي مميز مستوحى من شكل الأهرامات نفسها، لدرجة إن ناس كتير بدأت تسميه “الهرم الرابع”.

وبحسب التقرير، أول ما تدخل المتحف هتحس كأنك داخل مطار عالمي ضخم، لكن بدل شاشات السفر والطوابير، هتلاقي نفسك وسط تماثيل وآثار عمرها آلاف السنين. وفي قلب القاعة الرئيسية، بيستقبلك تمثال رمسيس الثاني العملاق، بارتفاع حوالي 11 متر ووزن يتجاوز 80 طن، تحت سقف متصمم بطريقة تخلي أشعة الشمس تتعامد على وجهه مرتين كل سنة، في مشهد بيشبه ظاهرة تعامد الشمس في معبد أبو سمبل.

الصحيفة كمان انبهرت بموقع المتحف نفسه، خصوصًا الإطلالة المباشرة على أهرامات الجيزة من خلال الواجهات الزجاجية الضخمة، وقالت إن المشهد يخليك تحس إنك داخل فيلم تاريخي ضخم، أو مسرحية عظيمة أبطالها ملوك وحكام قدماء المصريين.

المتحف، بحسب التقرير، بيضم أكتر من 100 ألف قطعة أثرية، منها حوالي 50 ألف قطعة معروضة للجمهور، بترتيب زمني بياخد الزائر في رحلة من عصور ما قبل التاريخ لحد العصر اليوناني الروماني. لكن أكتر جزء لفت انتباه الصحيفة كان جناح توت عنخ آمون.

ما يفوتكش كمان: دليل أسعار تذاكر المتحف المصري الكبير 2026.. قبل الزيادة الجديدة في نوفمبر

ولأول مرة منذ اكتشاف مقبرة الملك الشاب سنة 1922 على إيد هوارد كارتر، بتتعرض كل مقتنيات توت عنخ آمون في مكان واحد. وده يشمل القناع الذهبي الشهير، والتوابيت المرصعة بالأحجار الكريمة، والعجلات الحربية، والملابس والصنادل الخاصة بالملك الصغير، وحتى التفاصيل اليومية اللي كانت جزء من حياته داخل القصر.

التقرير وصف التجول داخل جناح توت عنخ آمون بأنه أقرب للسفر عبر الزمن، خصوصًا مع طريقة العرض الحديثة والإضاءة والتكنولوجيا المستخدمة داخل المتحف، اللي بتساعد الزوار يشوفوا القطع الأثرية بشكل مختلف تمامًا عن المتاحف التقليدية.

ومن الحاجات اللي أشادت بيها The Times كمان، إن المتحف رغم حجمه الضخم بيقدر يستوعب آلاف الزوار يوميًا من غير ما الناس تحس بزحمة أو إرهاق، بسبب تصميمه المفتوح والمساحات الواسعة وتقنيات العرض الحديثة، بداية من شاشات الذكاء الاصطناعي وحتى تجارب الواقع الافتراضي.

الصحيفة توقفت كمان عند مركب خوفو الشمسية، اللي كانت موجودة لسنوات طويلة في مبنى صغير بجوار الهرم الأكبر، قبل ما يتم نقلها للمتحف المصري الكبير وعرضها بطريقة جديدة تليق بقيمتها التاريخية.

وفي نهاية التقرير، اعتبرت The Times إن المتحف المصري الكبير مش مجرد متحف عادي، لكنه “احتفال كامل بحضارة عظيمة”، ومشروع أخيرًا منح مصر مساحة تليق بحجم كنوزها التاريخية وتأثيرها الحضاري على العالم كله.