The Definitive Guide to Living in the Capital , Cairo , Egypt

في قلب القاهرة ووسط زحمة شارع نجيب الريحاني، في حكاية عمرها أكتر من 90 سنة. “البقالة الفلسطينية” مش مجرد محل بقالة، دي حكاية عيلة فلسطينية بدأت من القدس ووصلت للقاهرة، وحافظت على نفس الطعم والجودة جيلاً بعد جيل. من يافطتها الخشبية لحد ماكينة التقطيع القديمة، المكان بيحكي تاريخ بطعم ما يتنسيش.

إحنا في كايرو 360 دايمًا بندور على الجديد والمميز، لكن ساعات بييجى علينا وقت بنشتاق فيه لروح القاهرة الخديوية والفاطمية، ونحب ندور على الزمن الجميل وسط الزحمة. المرة دي حكايتنا في قلب القاهرة، وتحديدًا في شارع نجيب الريحاني، عن “البقالة الفلسطينية” اللي واقفة شاهدة على قرن كامل من الزمن.

من أول اليافطة الخشب القديمة، لحد الأرفف الداكنة والفاترينة وماكينة التقطيع العتيقة، كل ركن في البقالة بيحكي حكاية. حتى طريقة الحساب لسه زي زمان، وكيس الورق مكتوب عليه “البقالة الفلسطينية – إدارة الحاج هاشم بدران”.

القصة بدأت سنة 1905 لما الجد محمد علي بدران جه من القدس للجمالية يبيع الصابون النابلسي، وبعدها في 1934 افتتح أول بقالة صغيرة. سنة 1954 انتقلت لمكانها الحالي في شارع نجيب الريحاني، ومن ساعتها وهي مقصد لعشاق الطعم الأصيل.

هتلاقي هناك أجود أنواع الجبنة، والبسطرمة، والحلاوة الطحينية، بنكهة تخلي أي زبون يرجع تاني. وعن تجربة شخصية، أفضل جبنة رومي وبسطرمة في مصر هتلاقيهم هناك. الأسعار: كيلو البسطرمة 720 جنيه، كيلو الجبنة الرومي 360 جنيه، كيلو الجبنة البيضاء 220 جنيه.

دلوقتي المكان بيديره المهندس علي هاشم، حفيد المؤسس، واللي بيعتبر البقالة مش بس مصدر رزق، لكن جزء من هوية العيلة، وجسر بيحافظ على علاقة الحب بين القاهرة والقدس.

العنوان والتفاصيل:

4 شارع نجيب الريحاني – وسط البلد.

تليفون: 0225744086.

العمل يوميًا من 9 صباحًا لـ 10 مساءً (الأحد إجازة).

تقدروا تعرفوا أكتر عنهم من خلال صفحة الفيسبوك من هنا.