The Definitive Guide to Living in the Capital , Cairo , Egypt

البلكونة بتعتبر مساحة عظيمة في شقتنا، بتدخل منها أشعة الشمس الصبح، لكن مش كتير مننا بيستغلها صح، رغم إننا نقدر نضيف لها لمسة جمالية، تساعد في ترطيب الأجواء، وتحول البيت لمكان نابض بالنور والحيوية.

تزيين سور البلكونة بالورود الملونة، أو بأواني الزرع المعلقة على السور بيدي شكل راقي، خاصة لو تمت زراعتها بالياسمين البلدي أو فيكس هاواي لو كانت مساحة البلكونة كبيرة.

أما لو كانت مساحة البلكونة صغيرة فنقدر نشتري نباتات زينة مناسبة زي: الأسبرجس، الورد، الفل، مسك الليل، كمان ممكن زراعة النباتات المتسلقة اللي هتكون ساتر رائع لو كانت البلكونة في الدور الأرضي.

النباتات هي العنصر الأهم في فن تنسيق ديكور البلكونة، وده لأن النباتات بتخلق إحساس بالسلام والحيوية، ونقدر نحط النباتات في أواني على الأرض، أوعلى سور البلكونة أو حتى نعلقها في السقف.

وعن سور البلكونة، فنقدر نجمله بالورود الملونة، إلى جانب الزرع الأخضر، مع تزيين السقف كمان ببعض الأواني النباتية، ومن جوه ممكن زراعة كتير من النباتات المتسلقة.

وبينصح خبراء نباتات الزينة بمجموعة من النباتات المناسبة للبلكونات، ومنها: الإسبرجس الناعم والخشن، بسلة الزهورالمتقزمة، إسبدسترا، الجيرانيوم، البيجونيا، الأكاليفيا، السفندر، بيوتنيا، الجربيرا.

ونقدر نشتري النباتات دي كلها من أي مشتل أو صفحات أو مواقع بتبيع زرع أونلاين، كمان هنلاقي على مواقع التسوق زي جوميا وسوق أواني زرع بأسعار رخيصة جدًا.