The Definitive Guide to Living in the Capital , Cairo , Egypt

اختيارات كايرو 360: أجمد محلات الموضة في القاهرة لعام 2018
بواسطة
Cairo 360

وطبعًا كان لازم يكون للموضة مكان مميز في قائمة جوائز اختيارات محرري كايرو 360 لأفضل الأماكن في 2018، واختارنا مجموعة من الأماكن المهمة، واللي هتلاقوا فيها أجمل المنتجات وأحدث صيحات الموضة.

بوتيك 17 – Boutique 17

مكان مميز جدًا، بيقدم أحدث خطوط الموضة، وأكيد هتلاقوا فيه كل اللي بتدورا عليه.

مايزون 69 – Maison 69:

من المحلات اللي متخصصة بمعنى الكلمة في الأزياء والموضة. وبيقدم دايمًا حاجة جديدة ومختلفة. وده اللي رشحه للقائمة بتاعتنا للفائزين السنة دي.

بوهو جاليري – Boho Gallery:

بعد نجاح الفرع الأول لبوهو جاليري في مصر الجديدة، المحل قدر يوصل لكل مجانين التسوق في الناحية الثانية من القاهرة بفرعه الثاني في الزمالك. بيميز بوهو جاليري أنه بيجمع ما بين القطع المستوردة والقطع اللي بيصمموها الفنانين المصريين الشباب. وأجمل حاجة أن المعروضات متاح منها قطع محدودة، علشان ما تلاقيش نص مصر لابسة زيّك.

فيلا بابوشكا – Villa Baboushka:

من البوتيكات اللي حققت نجاح كبير من أول ما فتحت، والنجاح لسه مستمر بدليل أن المحل لسه بيفوز عندنا بجوائز اختيارات محرري كايرو 360 زي كل سنة. بيعجبنا في فيلا بابوشكا الاهتمام بالتفاصيل؛ من أول القطع المعروضة المميزة والأنيقة ولحد أناقة المكان نفسه، والموجود في الزمالك.

أورانج سكوير  – Orange Square:

ما نوعدكش أنك تبقى جيمس بوند لما تختار بدلتك أو تفصلها من أورانج سكوير، ولكن المضمون والمؤكد أنك هتلاقي بدلة تناسبك من بين تشكيلة البدل الكثيرة اللي جاية من بلاد الموضة العالمية زي إيطاليا وإنجلترا. ده غير أن المحل بيفصّل لك الاستايل اللي أنت عايزه بالتفاصيل اللي على مزاجك. وسواء اشتريت جاهز أو فصلت، البدلة هتاكل من عليك حتة.

بيمن – Beymen:

بيمن يعني ماركات عالمية مهمة زي ديور، شانيل ودولتشي & جابانا.  الموضوع مش بس متوقف على الملابس، ده ممتد للإكسسوارات والمكياج وحتى قطع الأثاث المختلفة. بالرغم من أن أسعاره فوق مستوى الأسعار العادية، إلا أنه من الأماكن اللي لما بتعمل تخفيضات بتعمله بجد.  

سامي أمين – Sami Amin:

من المحلات اللي بتتميز بطابع خاص بمنتجاتها واللي لحد دلوقتي ما حدش قدر أنه ينافسه. من أول قطع الحلي النحاسية، مرورًا بالشنط المصنوعة من الجلد الطبيعي وحتى قطع الأثاث والإكسسوارات المنزلية؛ منتجات سامي أمين المستوحاة من التراث المصري قدرت أنها تحقق نجاح وتثبت أن مقولة “البلدي يوكل” صح مية في المية.

تويا – Tuya:

هو من الأماكن القليلة جدًا في القاهرة اللي لسه بتقدم شنط ومحافظ رجالي وحريمي مصنوعة من الجلد الطبيعي، بعدما اكتسح الجلد الصناعي الساحة بقوة. وبعكس غالبية الأماكن اللي بتقدم منتجات من الجلد الطبيعي، تويا موديلاته حديثة ومناسبة لكل الأذواق.

مقترح