The Definitive Guide to Living in the Capital , Cairo , Egypt

رنا شرف

الصورة: Jugoslocos

السفرة الرمضانية من علامات الشهر الكريم عن كل المصريين، بنحس أنها لازم تكون مختلفة ومميزة عن باقي السنة، ويكون فيها تفاصيل رمضانية مبهجة! والمشروبات الرمضانية زي التمر هندي والسوبيا من أهم علامات رمضان في مصر، وسفرة رمضان ماتكملش غير بها، هنعرفكم في السطور الجاية على أماكن محلية في القاهرة بتعمل أحلى مشروبات رمضانية هتفرحك من بعد الإفطار ولحد السحور.

 

القبيصي فريش

رغم أنه معروف أكثر بأنه ملك المانجا والفراولة، إلا أن القبيصي فريش متمكن كمان في المشروبات الرمضانية زي السوبيا والخروب والتمر هندي والعرقسوس، وبيوفر طول رمضان عبوات من أول لتر ولحد 2 لتر.

 

فرغلي

ماينفعش نجيب سيرة المانجا من غير ما نذكر فرغلي، هو كمان ملك العصائر والرضعات المفتكسة زى رضعة القرد ورضعة الأسد والعصائر زي عصير اللب والدوم وغيرهم، وفي رمضان هتلاقوا كل المشروبات الرمضانية متوفرة وبجودة عالية.

 

 

المدينة المنورة

مش بس عنده أحلي أرز باللبن، ده كمان عنده سوبيا لاتقاوم مع باقة أكثر من عصائر رمضان المميزة.

 

سيتي درينك

من أشهر محلات العصائر الموجودة في القاهرة، سواء مناطق شعبية أو راقية، عنده عصائر مختلفة بتميزه زي الكيوي بالكاجو وغيرها، وطبعًا عصائر رمضان متوفرة عنده كلها وبجودة عالية.

 

هتشرب إيه النهارده؟!