“المليون كيلو متر ملون”.. مشاهد للتلوين من بلدنا هتحبب أطفالك في الفن
أنشطة فنية للأطفال المليون كيلو متر ملون كتب تلوين منتجات مكوك منتجات مناسبة للأطفال في مصر هدايا للأطفال
Mohamed Talaat
القاهرة فيها مبادرات ومشاريع كتير الهدف منها تقديم منتجات فنية للأطفال، يمكن مش كلها بتكون مميزة وجاذبة لاهتمام الأطفال، لكن الأكيد إنه فيها منها اللي معمول بإبداع حقيقي. هنتكلم معاكم عن منتج فني اشتريناه مؤخرًا وعجبنا جدًا، اسمه “المليون كيلو متر مربع”، وهو موجه للأطفال فوق سن 4 سنين، تعالوا نعرف تفاصيل المنتج ده.
ماكناش نعرف شركة “مكوك” قبل كدة، لكن بمجرد دخولنا على صفحتهم على فيسبوك اتعرفنا على أفكارهم الجميلة، ولقيناهم متخصصين أكتر في الألعاب الفنية اللي بتقدم للأطفال متعة واستفادة في نفس الوقت، وكمان بتحببهم بشكل غير مباشر في الفن.
المنتج اللي حبينا نجربه من منتجات مكوك اسمه “المليون كيلو متر ملون”، وده عبارة عن كتاب تلوين أقرب لمشروع فني متكامل بيشمل مشاهد من مصر للتلوين، والمشاهد دي أجمل حاجة فيها إنها بتعرف الطفل بشكل غير مباشر على تفاصيل الحياة في مصر، مش بس في المناطق الشعبية، لكن كمان في المناطق السياحية زي دير سانت كاترين مثلًا، الرسوم معمولة باحترافية شديدة، يعني اللي راسمها فنان بجد، وده ممكن يخلي الطفل يحب الرسم أصلًا مش بس التلوين.
المنتج بيشمل كمان كروت بريدية للتلوين، فاكرين الكارت بوستال بتاع زمان؟ أيوة هو بالظبط! الهدف من الكروت دي إن الطفل يقدمها لأصحابه وحبايبه كهدية بتحمل توقيعه وألوانه.
لقينا مع المنتج كمان ورق هدايا للتلوين، علشان الطفل يلف فيه أي هدية ويقدمها لحبايبه وأصحابه.
العبوة فيها كمان شخصيتين يقدر الطفل يلونهم وبعدها يعلقهم على الحيطة.
حبينا المنتج جدًا، ولما طلبناه من الموقع كان عليه عرض خاص وسعره كان 63 بدل 125 جنيه، والحقيقة هو يستحق السعر ده فعلًا، لإن مستوى تنفيذه ومستوى الطباعة هايلين!
ما فيش شك إن أجمل حاجة ممكن نزرعها في أولادنا هي إننا نخليهم يحبوا الفن، والمنتج ده قادر يعمل ده بشكل بسيط ومباشر، ونقدر نقول إنه هيعجب الأطفال والكبار كمان!
تقدروا تطلبوا المنتج من هنا.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
