The Definitive Guide to Living in the Capital , Cairo , Egypt

أعياد الميلاد والسنة الجديدة بدأت تهل علينا والزينة والشجر ظهروا في شوارع القاهرة وخاصة في المحلات التجارية، وطبعًا بنتمنى لكم عيد وسنة كلها خير وحب وسعادة، وكتير مننا بيحبوا يعملوا زينة الكريسماس في البيت ولكن بيكون عندهم أزمة نشتري منين، وكتير بيلجأ لأقرب مكان له، وده طبيعي، لكن النهاردة إحنا هنقولكم على 3 طرق لشراء زينة الكريسماس بأسعار كويسة وكمان هتلاقوا تشكيلة أكتر بكتير من الأماكن اللي بتكون قريبة منكم.

حارة اليهود

في منطقة الموسكي هتلاقوا حارة اليهود، وتقدروا توصلوا لها عن طريق أي ممر تحت كوبري الأزهر أو عن طريق ممرات شارع الموسكي الرئيسي، وهناك هتلاقوا كل أنواع الزينة “الشعبية والمتوسطة”، وأسعارهم رخيصة علشان الجودة وهتقدروا تعرفوا الفرق بين كل منتج والتاني بسهولة كخامة، وخلوا بالكم لازم تلفوا الأول كتير وتتفرجوا قبل ما تقرروا هتشتروا إيه، وتقارنوا بين الأسعار لأنها متفاوتة ولكن في المجمل أرخص بكتير من المحلات اللي بره، ونصيحة بلاش تروحوا بعربيتكم ولو حابين يبقى تركنوها في جراش الأزهر أو شارع بورسعيد وتكملوا مشي، ولو هتشتروا حاجات كتير هيطلع حد معاكم من المكان اللي هتشتروا منه ويوصلكم.

 

النزهة الجديدة

ده مكان زي ما بيقولوا “طلع في المقدر جديد”، من كتر جمال وحلاوة كل حاجة هناك هتروحوا مفلسين، فلازم تعملوا قائمة أنتم محتاجين إيه بالظبط، ومعظم المحلات دي هي المستورد لزينة الكريسماس بأنواعها وأشكالها، وتقدروا تشتروا من عندهم ما يسر القلب ويخطف العين، بس أهم حاجة تحافظوا على ميزانيتكم، وماتنسوش لو أنتم هتقدروا تشتروا حاجات وهتشيلوها للسنين اللي جاية هيكون أفيد وأوفر لكم.

مواقع أونلاين

فيه ناس مننا بتحب الشراء الأونلاين علشان تريح دماغها وعلشان ظروفها، وده شيئ حلو ووحش في نفس الوقت، والحلو فيه توفير المجهود والوقت وإنكم تقدروا تفلتروا المنتجات من السعر الأقل للأعلى، أما الوحش فأننا مش بنعرف الخامات للأسف ولا بنقدر نقارن بين منتجين، ولكن في العموم ناس كتير بتفضل الأونلاين، ومن هنا خلينا نقولكم أن أهم 5 أماكن تقدروا تشتروا منها زينة الكريسماس أونلاين، وهي ” أمازون مصر – جوميا – نون – آيكيا – هوزمارت“.