The Definitive Guide to Living in the Capital , Cairo , Egypt

وزارة النقل المصرية أعلنت عن قرب انطلاق نظام جديد لشراء تذكرة مترو الأنفاق، عن طريق تطوير بوابات دخول وخروج المترو علشان تكون متوافقة مع البطاقات البنكية عن طريق الخصم المباشر من الحساب البنكي لكل اللي بيستخدموا المترو، وده لتسهيل حركة الدخول والخروج للركاب، وعلشان مايبقاش فيه زحمة على شبابيك التذاكر، وفي هدف تاني وهو التقليل من استخدام التذاكر الورقية.

وبحسب بيان لوزارة النقل هتكون البوابات مجهزة على أعلى مستوى من التطوير والأمان علشان يكون لكل شخص معاه بطاقة بنكية (فيزا) القدرة على الدخول والخروج من البوابات المخصصة وهيتم خصم قيمة الرحلة مباشرة بدون الحصول على تذاكر بعد نهاية الرحلة، وطبعًا ده مش معناه إلغاء استخدام التذاكر الورقية أو الكارت الذكي، لكنها وسيلة جديدة لتوفير الراحة لركاب مترو الأنفاق.

ة

أما عن التكنولوجيا الحديثة المستخدمة، فقالت الوزارة إنه هيكون في “ريدر” خاص بيقرأ بيانات البطاقات البنكية اللي بيستخدمها الركاب، وهتنفذه شركة سويسرية متخصصة، واللي جربت النظام ده على إحدى الماكينات ونجحت في الإختبار.

كمان هيئة مترو الأنفاق نجحت في أنها توفر 4 ماكينات صرف آلي للتذاكر بنظام TVM، وتم تركيبها في محطات الخط الثالث “مصر الجديدة”، ومن خلالها تقدروا تشتروا تذكرة مترو بدون اللجوء لشباك التذاكر، وقريب هيتم تعميم التجربة في كل المحطات، والماكينات الجديدة بتشتغل عن طريق الموبايل أو بطاقة بنكية، أو الكارت الذكي لمترو الأنفاق.