The Definitive Guide to Living in the Capital , Cairo , Egypt

مظهرك دايمًا مهم، ودايمًا محتاج اهتمام، وقصة شعرك قبل ما تكون شكل حلو، فهي راحة نفسية، وبتدي ثقة في النفس، والـ “نيو لوك” في الغالب بيعبر عن مودك وبيخليك دايمًا أحسن، لكن دايمًا عندنا أزمة في مواعيد “الحلاقين” اللي ممكن تروح تركن عندهم حبة حلوين، حاجة كده تحسها طبع ومش هيتغير.

وفي محاولة لتغيير الواقع ده، ظهر تطبيق “Cut Egypt” اللي بيديك فرصة لتجربة جديدة، وهي إنك تحجز معاد عند أي حلاق أو صالون تختاره من التطبيق على حسب المنطقة اللي موجود فيها.

التطبيق لسه جديد، ومجموعة الصالونات فيه مش كبيرة، لكن بيغطي مناطق كتير في القاهرة الكبرى، ونتوقع زيادتها الفترة اللي جاية، والحقيقة هو سهل الاستخدام، فبمجرد ما تسجل اسمك ورقم تليفونك هتختار المنطقة، وبعدها بيظهر لك المحلات المتعاقد معاها، ومنها تختار اللي يناسبك، وبعدها بتختار نوع الخدمة اللي محتاجها، وكل خدمة وليها سعرها.

بعد ما تختار الخدمة، لازم تختار المعاد بالتاريخ والوقت المناسب، وهتلاقي مكان في التطبيق لكوبونات الخصم لو معاك كوبون، وحاليًا لكل المستخدمين الجدد في كود “cut50” وبعدها بتأكد الحجز، وبكده تكون حجزت المعاد، وهتروح المكان تلاقي الحجز باسمك.

الجديد بقى، إن لو أنت مش قادر تروح للحلاق، ممكن تطلبه “دليفري”.. آه والله زي ما بقولك كده.. وهيجيلك لغاية عندك في الوقت اللي تختاره.

الحقيقة إحنا في كايرو 360 جربنا الخدمة، طلبنا من أحد الصالونات تسريحة شعر، مع استشوار، لزوم التجربة مش أكتر، وكان السعر بيتراوح من 50 لـ 80 جنيه، ولما روحنا المكان، وصلنا متأخرين 15 دقيقة، لكن لقينا حجزنا موجود، وبالفعل دخلنا على الكرسي على طول وخلصنا، وكان حسابنا بعد خصم 50% حوالي 50 جنيه، وده لإننا طلبنا حاجات زيادة عن اللي طلبناها على الأبليكيشن.

لتحميل التطبيق لأجهزة أندرويد من هنا.

لتحميل التطبيق لأجهزة iOS من هنا.

وممكن تتابعوا العروض المستمرة اللي بيقدمها التطبيق على صفحة الفيسبوك من هنا.

رقم التليفون: 01000388605