The Definitive Guide to Living in the Capital , Cairo , Egypt

الفن موهبة بتتولد معانا، وكل واحد فينا جواه فنان لازم يكتشفه وبعدين يطوره لحد ما موهبته تضيف حاجة حلوة له وللمجتمع، وفيه نماذج كتير نجحت في إخراج موهبتها للعلن، وطورتها وأصبحت مفيدة للمجتمع. مها محسن هي مؤسسة مشروع “تكوين” الفني، واللي فكرته الأساسية هي استخدام قشرة الخشب الصناعي لصناعة لوحات فنية.

في السطور الجاية هنعرفكم أكثر على مشروع “تكوين” ومؤسسته “مها”.

مها محسن خريجة كلية تجارة قسم إدارة أعمال، وكمان عملت دبلومة في إدارة الأعمال، وهي عندها حب للفنون بشكل عام وحب للرسم بشكل خاص، وكان والدها بيشجعها على الرسم وتحسين الخط لأن موهبتها موروثة منه، وكان عندها حلم دخول كلية فنون جميلة ولكن قدرها كان كلية تجارة، ورغم نجاحها في مجالها لحد ما أصبحت مدير إداري ومساعد رئيس مجلس إدارة في إحدى الشركات الكبرى، لكنها قررت ترجع تاني الفنان اللي جواها من خلال الاشتراك في ورش عمل فنية ومعارض وصالونات الشباب لعرض أعمالها الفنية. بدأت “مها” تميل لأعمال الهاند ميد، زي إعادة التدوير وصناعة الإكسسوارات وعمل المجسمات وغيرهما من التجارب الفنية.

“مها” كانت بتلجأ للمواقع المتخصصة للبحث عن كل جديد في مجال الهاند ميد، لحد ما لقت فن قشرة الخشب والمعروف باسم “الماركتري”، واتفرجت على فيديوهات كتير علشان تفهمه وتتقنه، وبعدين شاركت في ورشة عمل علشان تتعلم صح، وبعدها قررت تبدأ طريقها وتعمل مشروعها “تكوين”، واختارت الاسم ده لأن فكرة “الماركتري” بتعتمد على تكوينات خشبية متقطعة أجزاء متساوية ومتداخلة وبتدي إحساس أنها قطعة واحدة.

بتقول “مها” إنها استخدمت قشرة الخشب الصناعي في التابلوهات لأن سمك القشرة أقل بكتير من الطبيعي وسهل تكوينه وتشكيله وكمان ألوانه متعددة لأنه مصبوغ، بعكس الطبيعي اللي قشرته سميكة وسعره غالي وصعب تقطيعه، وبتفتكر إنها استخدمت في أول تابلوه زخارف إسلامية بها خشب طبيعي بألوانه الطبيعية علشان توصل احساس الدفء والأصالة وعبق التاريخ من خلال التصميم.

أول مرة نجحت مها محسن في عمل تصميم تابلوه كان تابلوه مفتاح الحياة، وبعد كدة استمرت الرحلة الفنية.

وعن اختيارها لمجال لزق القشرة على الخشب رغم تفاصيله الكتير وهي شاطرة في حاجات أسهل قالت إن فكرة الخشب استفزتها وشدتها لأنها بطبيعتها بتحب الرسم فلما تحول الرسم لقطعة خشبية بتحس أن التصميم اختلف رغم أنه نفس النموذج ولكن بمجرد ما يتلزق القشرة عليه بتحول لقطعة فنية مميزة.

تقدروا تعرفوا أكتر عن مشروع “تكوين” من خلال زيارة صفحتهم على إنستجرام من هنا.