جاليري فنون: الابتكار والإبداع في مكان واحد في المقطم
Fatema Abd El Kawey
الواحد مننا وهو راجع في آخر يومه غالبًا بيكون مش شايف قدامه طول ماهو في الطريق ومش بيفكر غير في السرير اللي هيتقلب فيه أول ما يروّح، لكن الغريبة إننا وإحنا مروحين كل يوم كان بيلفت نظرنا ألوان جاليري "فنون" خصوصًا أنه في شارع جانبي في المقطم مش الشارع الرئيسي فنوره وشياكته تاخد عينك على طول.
قررت أدخل وأشوفه وكان قرار موّفق الحقيقة لأنه أعاد ليّ نشاطي تاني في أخر اليوم بسبب الألوان والفن والإبداع اللي جوه المكان ده.
كتير من الحاجات اللي في المكان عبارة عن مزيج بين موارد بسيطة وشغل يدوي مُتقَن فيطلع منتج جميل أوي تقدر تحطه في البيت أو في أي مكان فيدّي للمكان شياكة حقيقية.
عاجبنا أوي من المنتجات اللي بالشكل ده أبجورة معمولة بعلبة الفيريون ومرسوم عليها بوب مارلي، وكمان أبجورة تانية عرفنا من صاحب المكان أنها اسمها "عبقرينو" لأنها على شكل واحد قاعد حاطط رجل على رجل وماسك كتاب في إيده واللمبة منورة من عند راسه كل ده معمول من مواسير حديد.
فيه شكل تاني من المنتجات وهو عبارة عن قطع أثاث من خشب قيم جدًا عليه رسومات فنية مبهجة وبديعة جدًا، المختلف في الشكل ده من المنتجات أنه مش بيشتغل على قطع أثاث عادية لكن حاجات مبتكرة مفيدة قوي للبيت.
عاجبْنا من المنتجات دي وِحدة أدراج عبارة عن 6 دورج ألوانها صيفية؛ أصفر في فوشيا في لبني وأخضر وفيها من فوق مراية بتتفتح، وكمان عاجبنا أوي طبلية مرسوم عليها رسم أفريقي بتصميم جميل أوي وألوان تخطف العين.
مش بس هي دي أشكال المنتجات في الجاليري بالعكس خير ربنا كتير في المكان ده، فاللي عايز أطباق وكوبيات مرسوم عليها هيلاقي واللي عايزة تحط في مطبخها وحدة توابل موجود، وكمان صواني السرير من الحاجات المميزة أوي عندهم والجميلة جدًا.
الناس اللي بتركز في التفاصيل لما تدخل الجاليري هتاخد بالها من حِكَم مُلهمة مكتوبة قُرب السقف بالخط العربي ودي من الحاجات اللي بتدي المكان طابع خاص.
الأسعار بشكل عام مناسبة للمجهود اللي بيبذل علشان المنتج يطلع بالشكل ده ووأنت بتدفع هتحس أن الحاجة تستاهل ومش هتندم.
وبالمناسبة الجاليري هيشارك في "المعرض الدولي للصناعات اليدوية" اللي هيكون في أرض المعارض من 18 نوفمبر حتى 25 نوفمبر بشعار (صنع بفخر في مصر)
تقدروا تتابعوا صفحتهم على الفيسبوك من هنا وتطلبوا من عليها الأوردرز لكن وإنتم عارفين إن الاستلام بيكون من الجاليري في المقطم علشان تتأكد من جودة طلبك قبل ما تاخده.
مقترح
تسوق
خلّي السعادة تكمل.. تشتري منين أحلى شوكولاتة في القاهرة؟
أفضل أنواع الشوكولاتة أماكن بيع شوكولاتةـ محلات شوكولاتة +3
الحياة في كايرو
