The Definitive Guide to Living in the Capital , Cairo , Egypt

صديق إيطالي، زارنا في مصر، وكان هيقعد معانا كام يوم، وطبعًا إحنا في كايرو 360، قررنا نجيب له هدية مميزة يفتكرنا بيها في إيطاليا، وبدأنا رحلة البحث عن الهدايا المناسبة، ونزلنا الحسين ورحنا الفسطاط ودورنا في الجاليريهات لحد ما واحدة صاحبتنا رشحت لنا مكان مميز نشتري منه، وبالفعل رحنا وقررنا ننقل لكم تجربتنا في La Maison Blanch concept store في المعادي.

وصلنا المكان وإحنا متوقعين أنه هيكون زي أي مكان عادي، ولكن من أول ما شفنا الباب بتاع المكان والتصميم الخارجي فرحنا وقلنا مش هنخرج إلا لما نشتري من عندهم حاجات كتير، وأول ما دخلنا لقينا عالم تاني مختلف جدًا وكأننا انتقلنا بالزمن، من خلال ركن الأثاث العربي اللي مصنع بشكل مميز، ده غير الجاليري والمنتجات الهاند ميد والأكسسوارات، وبعد ما أخدنا جولة في المكان قررنا أخيرا نكتفي بشراء 4 هدايا فقط.

 

الاستقبال من الموظفين وصاحبة المحل ممتاز، ودائمًا مبتسمين، وطلبوا مننا ناخد جولة الأول على راحتنا وبعدين نشوف محتاجين إيه، ولما خلصنا جولتنا مسألوش عاوزين إيه، ولكن بدأوا يشرحوا لنا الحاجات الموجودة.

 

الحقيقة الإختيار كان صعب جدًا بالنسبة لنا، وكان شيء محير، وقررنا نشتري حاجة مميزة، فاشترينا شنطة وسط معاد تصنيعها من منتجات بلاستيك “أكياس” بسعر 440 وجنيه، وكانت الفكرة أن صديقنا هينقل لأصدقائه أن مصر بتستغل الأكياس اللي بتترمي في الزبالة بعد معالجتها وبيصنعوا منها منتج خامته لا تقل عن أي براند عالمي وعملية وبتتحمل جدًا.

 

تاني حاجة قدرنا نشتريها كانت عبارة عن مصباح إضاءة معلق، وده ثمنه كان غالي شوية، بـ2000 جنيه مصنوع من الزجاج الملون والنحاس، كان بيدور عليه، والحقيقة ماكنش هدية لأنه هو كان بيدور عليه علشان شغل ولما بعتنا له الصورة بتاعته طلب أنه هو اللي يدفع تمنه وصمم على ده، وكان مبسوط بيه جدًا، لأن كان بيدور عليه في مصر كلها ومش لاقي الجودة دي.

اشترينا كمان طقم “صواني” اختراع مصري، مصنوعة من الخشب والصينية جواها رسم يدوي جميل، سعر الواحدة 350 جنيه، ورغم أن سعرها عالي شوية بس جودتها كانت أفضل من اللي في السوق والفينش بتاعها مميز.

اشترينا كمان من عندهم “سلسلة” لزوجته، وكانت عبارة عن شغل هاند ميد، والشكل اللي اخترناه كان عبارة عن علاقة من القماش كتان، والشكل معدن مطلي فضة مع ضمان إن لونه مايتغيرش، وكان سعرها 280 جنيه، ولكن أخدناها لأننا كنا أخدنا رأي صديقنا وفرح بيها جدًا، وبصراحة كخامة كانت تستاهل، والحمد لله اننا أول الشهر.

اكتشفنا كمان أن المكان بيعمل ورش رسم، وعندهم لبس كل اللي مصممينه مصريين ومميز جدًا، ولكن محبناش ندور فيه أو نسأل لأن مكنش من اهتماماتنا، وحتى شغل الموبيليا العربي كان عاجبنا.

 تقدروا تشوفوا صفحة الفيسبوك هنا، وانستجرام هنا. 

والعنوان: 7ب شارع 199 دجلة المعادي.

ورقم التليفون: 01124557744