The Definitive Guide to Living in the Capital , Cairo , Egypt

النفس اللي تقدر تشوف الجمال وتحسه وتقدره دي نفس عزيزة، وأعز منها النفس اللي ما بتقفش عند حد التذوق وبس، وبيكون دورها مع الجمال أنها تصنعه، وتنشره للناس علشان تديهم فرصة أنهم يدوقوه ويعيشوه زي ما هي داقت وعاشت.. وفي مقالنا ده هنشاور لكم على أفضل الأماكن اللي قدرت تعمل ده باحترافية وتميُّز في مجال الديكورات والإكسسوارات المنزلية..
يللا بينا..

جوائز اختيارات محرري كايرو 360 عام 2016 لأفضل أماكن الديكورات والإكسسوارات المنزلية:

 

نيللينز – Nillens

المكان اللي هيديك طاقة أمل غير عادية في أن المنتج المصري ممكن فعلًا يبقى أعظم منتج في الدنيا لو بس شوية معرفة مع شوية إتقان! المنتجات اللي بيعملها المكان كلها منتجات قطنية مصرية مصنعة محليًا بجودة عالية جدًا وتصميم جمالي ممتاز بالإذافة لكونها عملية إلى أبعد حد.. احنا نقول عمار يا مصر بقى.

 

إيكليجو ديزاين – Eklego Design

عالم التصميم بيحتاج مخزون كبير من الأفكار والنماذج وانفتاح على طبائع مختلفة علشان تعرف تطلع بناتج مميز ومبدع، الناس في "إكليجو" مدركين الحقيقة دي كويس أوي، علشان كده دايمًا هتلاقي عندهم المميز والجديد.

ديزاين إمبوريوم – Design Emporium

ديزاين إمبوريوم بقى لهم ربع قرن كامل في مجال الديكورات والديزاين الداخلي محافظين على الريادة فيه، وده إن دل على شيء فإنما يدل على كفاءة غير عادية، وتركيز شديد جدًا، وتطور دائم، وخبرة إيجابية مستمرة في الزيادة مع الوقت.

 

ماندالا – Mandala

الاختلاف والتميز صنعة، والصنايعي الشاطر فيها هو اللي يقدر دايمًا يقدم لك اللي مش هتلاقيه عند غيره، وما يعتمدش على كده وبس.. يركز كمان على أنه يقدمهولك بجودة عالية علشان تفضل حاسس طول الوقت أنه حابب يخدمك فعلًا مش بيستغل احتياجك.. والناس في "ماندالا" صنايعية شطار.. أوي!

كف فاطمة – Kaf Fatma

العمل التقليدي ممكن يتحول لعمل غاية في الإبداع لو أنت عملته بطريقة غير تقليدية.. مجال زي الأثاث والمستلزمات المنزلية ده مجال زحمة جدًا، وخط السير فيه بقى تقليدي زيادة عن اللزوم، لكن مكان زي "كف فاطمة" لعب على وتر الإبداع بقوة، وهيفرجك أحلى كلام!

 

فير تريد إيجيبت – Fair Trade Egypt

بيقول لك اختيار الهدايا فن.. أُمال صناعة الهدايا بقى يبقى إيه! الناس دي مسكت سكة الهدايا وخلصتها من الأول للآخر رايح جاي، نقطة القوة الحقيقية في أنهم مدركين أوي عملية اختلاف الأذواق وقادرين يخدموها كلها بنفس الدرجة من الجودة والاحترافية.

 

كريتيف إيجيبت – Creative Egypt

المصمم مش مجرد صاحب صنعة بيقدم لك منتج، المصمم المفروض أنه صاحب فلسفة وفكر بيترجمهم في المنتج اللي بيطلعه أيًا كان هو إيه..
والناس في "كريتيف إيجيبت" فاهمين ده كويس، علشان كده دايمًا هتحس أن شغلهم حي وبينطق بقصص وحكايات، مش حاجة مالهاش روح..
ويا سلام بقى لما تبقى الحكايات مصرية 100%.

بوهو جاليري – Boho Gallery
هناك التميز مُرَكَّب شوية، يعني هما مش بس متميزين، لأ وكمان شغالين على أن كل روادهم يبقوا كمان متميزين! ده بيعملوه عن طريق أن كل تصميم بيتعمل منه إنتاج محدود جدًا وبعدين خلاص يتكل على الله ويعملوا غيره.. وبكده اللي يتعامل معاهم يحس أن المنتج اللي اشتراه كان معمول علشانه هو وبس، مش مليون واحد غيره هيستخدمه!

هاوس آند جاردن – House & Garden

الذكاء والبساطة عنوان عريض للمكان ده.. من غير كيميا ولا تعقيد، قرروا أنهم يركزوا على العامل الأهم بالنسبة لأي عميل محتمل، وهو عامل المناسبة.. لو بتدور على حاجة عملية ومناسبة في السعر من غير إهمال عامل الجودة والإتقان.. يبقى ده مكانك الأمثل.

مبروك لكل الفائزين.