The Definitive Guide to Living in the Capital , Cairo , Egypt

المنتجات المصنوعة يدويًا (الهاند ميد)، دائمًا بتكون مختلفة، خصوصًا لو مصنوعة من الخشب. وسواء كان المنتج بنشتريه لنفسنا، أو هدية، ففي الحالتين هيكون مفرح ومبهج. تعالوا نتعرف أكثر على مشروع “خشبة”، اللي بيهتم أنه يقدم أجمل المنتجات الخشبية واللي بيتم تصنيعها بحرفية ومهنية عالية.

خشبة هو مشروع فني مؤسسه هو حسن خالد، المصمم المهتم بالحرف والفنون والحلى الخشبية، وهو كمان بيدرب على الحرف دي، واللي درسها من خلال منحة الأمير تشارلز في مدرسة الحرف والفنون التقليدية في القاهرة، ودرس كمان التصميم الصناعي ثنائي وثلاثي الأبعاد، مع فاب لاب مصر، ده غير دراسة فنون الحلى والصياغة وتطبيقات التجميع اليدوي بمؤسسة عزة فهمي، يعني درس كل ما يتعلق بإنتاج أجمل التصميمات مع موهبته المميزة.

في البداية، كان المشروع مقتصر على فن الأركت وتطبيقاته البسيطة، لكن طموحات خالد كانت أكبر، وبدأ في تحويل المسار بهدف إنه يبقى مشروع فني يضم كل خبراته وحبه لفن التطعيم على الخشب والتشكيل بقشرة الخشب وفن المنجور، وغيرها من الفنون.

مشروع “خشبة” بدأ في 2014 وما زال مستمر في تقديم منتجات فنية زي التابلوهات وعلب المجوهرات والهدايا والمرايات وصواني التقديم والإكسسوارات الشخصية والمنزلية والميداليات والديكوارات وغيرها. وكل ده بتصميمات مميزة. الأسعار عندهم حسب طبيعة المنتج وملهاش رينج محدد، وكل منتج بياخد وقت ومجهود وتصميم مختلفين عن بعض، والتسعير بيكون حسب الجهد والخامات المستخدمة.

تقدروا تعرفوا أكتر عن مشروع خشبة من خلال صفحة الفيسبوك من هنا.