The Definitive Guide to Living in the Capital , Cairo , Egypt

تسوق

“دكان زمان”.. إبداع “هاند ميد” من التراث المصري والأفريقي

أعمال فنية دكان زمان فن تشكيلي منتجات هاند ميد في القاهرة هاند ميد هدايا
“دكان زمان”.. إبداع “هاند ميد” من التراث المصري والأفريقي
بواسطة
Mohamed Talaat

مصر فيها كتير من الفنانين اللي بيصنعوا منتجات فنية “هاند ميد”، لكن الفنانة التشكيلية “إيمان قطب” صاحبة مشروع “دكان زمان”، ليها لمسة خاصة بيها، خلتها مختلفة عن باقي الفنانين، بتحاول “إيمان” تقدم إبداع فني من التراث المصري والأفريقي، وهدفها إن كل الناس تقدر تمتلك عمل فني في بيتها بكل سهولة وبسعر معقول، في السطور الجاية هنتعرف أكتر على “دكان زمان” من خلال حوارنا مع مؤسسته “إيمان قطب”.

إيمان قطب هي فنانة تشكيلية، ومؤسسة “دكان زمان” للفنون اليدوية ، وفي الأصل خريجة كلية آداب عين شمس، قسم مكتبات ومعلومات، وهي بدأت مشروعها سنة 2015، من خلال المزج بين فن البورتريه وأدوات كتير بنستخدمها في حياتنا اليومية، زي الأكواب. وكمان نفذت تابلوهات ولوحات تشكيلية، ده غير الإكسسوارات المختلفة.

إيمان ماكتفتش بده، لكن فضلت تعمل تجارب واختبارات لأنواع مختلفة من الخامات لحد ما استقرت على إنها تستخدم خامات خاصة بجودة عالية، وكمان تكون صالحة للاستخدام اليومي، وتكون آمنة ومايحصلهاش تلف من الاستخدام، علشان كده هي بتستخدم ألوان أكريليك على الجلود، أما المجات فبتكون من البورسلين.

وعن تصميماتها الفنية، بتقول “إيمان قطب” لـ كايرو 360 إنها بترفض تمامًا نقل أي تصميم أو تقليده، وبتحرص دائمًا إن كل شغلها يكون غير تقليدي، لأن هي بتحب الإبداع، وعندها رسومات وتصميمات خاصة بيها، وبتضيف إن العملاء من حقهم يقترحوا أي تصميمات عاوزينها، ولكن بشرط إنها تكون فعلًا هتخرج منتج جديد وجميل ومختلف.

أفكار ورسومات إيمان قطب، صاحبة مشروع “دكان زمان”، من وحي خيالها، وكلها مسجلة كحقوق ملكية، وهي بتحاول دايمًا تطور من نفسها ومن شغلها، مع الحفاظ على تأثير البورتريه المصري والأفريقي في أعمالها، لأن هدفها الرئيسي من المشروع هو إبراز الهوية المصرية والأفريقية.

وبتقدم “إيمان” منتجات كلها مرسومة يدوي، زي “مجات – إكسسوارات – أجندات – تابلوهات جلد – تابلوهات كانفاس – أحذية”.. الخ، والأسعار عندها بتبدأ من 150 جنيه.

ولو عاوزين تتعرفوا أكتر على شغل “دكان زمان” والفنانة التشكيلية “إيمان قطب”، تقدروا تزوروا صفحتها على فيسبوك من هنا.

رقم التليفون: 01154332811

مقترح