The Definitive Guide to Living in the Capital , Cairo , Egypt

مصدر الصورة: اليوم السابع

يوم الأربعاء 2 أكتوبر هينطلق أول يوم لمعرض تراثنا للحرف اليدوية، واللي هيقام في مركز مصر للمعارض الدولية، وهيستمر حتى يوم 6 أكتوبر، وده بينظمه جهاز تنمية المشروعات المتوسطة والصغيرة ومتناهية الصغر كل سنة، وعلشان تستفيدوا منه هنقولكم على كل اللي محتاجين تعرفوه عن المعرض ومواعيده واللي هيتباع فيه.

معرض تراثنا هو واحد من أهم معارض المنتجات التراثية والحرف اليدوية في مصر، وهيقام السنة دي لأول مرة في قاعة 4 في مركز مصر للمعارض الدولية اللي في محور المشير، بجوار مسجد المشير طنطاوي في التجمع الخامس، وهيكون مفتوح للجمهور من الساعة 10 صباحًا حتى 10 مساءً، وهيشارك فيه أكثر من 500 مشروع وجمعية أهلية متخصصين في الصناعات اليدوية والتراثية.

هتلاقوا جوا المعرض كل اللي محتاجينه من منتجات التراث المصري من مختلف المحافظات زي (الكليم اليدوي – التللى – مفروشات أخميم – إكسسوار حريمي – منتجات نحاسية – منتجات زجاجية – منتجات التطريز على القماش – تابلوهات – خيامية – صدف – وحدات إضاءة – سجاد يدوي – خزف – مفروشات – جلود – صواني وتحف خشبية – منتجات سيناء – خوص).

المعرض مهمته مساعدة العاملين بمجال الحرف التراثية وتسويق منتجاتهم في الداخل والخارج، وهو بيوفر مساحات لكل عارض تبدأ من 10 متر مربع وسعرها 1000 جنيه، كأقل مساحة وبتصل إلى 15 متر طوال فترة المعرض، ويعتبر فرصة مميزة للحرفيين، والمهتمين بالتراث.

وكمان هيشمل المعرض عروض مجانية يومية لفرق الفنون الشعبية من مختلف المحافظات للزوار، منها رقص شعبي وتنورة وعزف على الدفوف والآلات الموسيقية التراثية والغناء والرقص الفلكلوري، ولأول مرة السنة دي هيشمل المعرض جناح لتعليم الأطفال الرسم وعروض حية للصناعات التراثية، وده لتأكيد الدور الثقافي والفني للمعرض لإحياء الفنون التراثية.

وعلشان معرفة وثقافة أكتر إدارة المعرض هتعمل مساحة مخصصة للعرض الحي للحرف اليدوية والتراثية وفيها هتقدروا تعرفوا تاريخ وتفاصيل صناعة المنتجات زي العمل على نول إنتاج السجاد اليدوي، والحفر على النحاس، وتشكيل الخزف والفخار والجريد، ومعاه كمان هيبقى موجود متحف للحرف التراثية فيه مراحل تطور بعض الصناعات اليدوية ومنها (النحاس – الصدف – منسوجات أخميم – السجاد اليدوي – الخزف – الملابس التراثية)، وتقدروا تزوروا الخيمة البدوية وجناح منتجي محافظة شمال سيناء، وجناح المأكولات التراثية اللي بتتميز بيها كل محافظة.

والمعرض هيضم مجموعة من المشاركين في مشروع شارع مصر علشان تلاقوا أكل وشرب بأسعار مخفضة، ولتشجيع الشباب على الاستمرار في مشروع شارع 306 اللي بدأ ينطلق في القاهرة الكبرى مع بداية 2019.

وعلشان المسافة ماتكونش بعيدة عليكم المعرض خصص أتوبيسات خاصة لنقل كل المهتمين مجانًا لمكان المعرض، أيام 3، 4، و5 أكتوبر، وهيكون فيه خطين سير، الخط الأول من ميدان التحرير من أمام محطة Go Bus إلي مركز مصر للمعارض الدولية وهيشمل الذهاب والعودة ، والخط الثاني هيبدأ من ميدان الحجاز مروراً بميدان سفير وصلاح الدين وتريومف وهيكون فيه 5 أتوبيسات مواعيدها (10:30 صباحًا – 12:30 ظهرًا – 2:30 مساءً – 4:30 مساءً، و6:30 مساءً).