The Definitive Guide to Living in the Capital , Cairo , Egypt

“خليك في البيت”، ده شعار فريق كايرو 360 اللي دايمًا بننادي بيه وبنؤكد عليه، لكن طبعًا متفهمين إن فيه ناس كتير بتكون محتاجة تنزل تشتري التزامات البيت، حتى لو بشكل أقل من الأول، علشان كده هنقولكم في الموضوع ده نصائح مهمة للتسوق الآمن في زمن فيروس “كورونا” المستجد.

خلونا نتفق في الأول إن التسوق الآمن للمستلزمات الأساسية، خصوصًا في مراكز التسوق، أمر صعب في زمن تفشي “كورونا” في كل مكان في العالم.

وبالإضافة لتدابير الوقاية وإجراءات الحماية اللي تم الإعلان عنها كتير مؤخرًا، زي تجنب لمس عينيك أو أنفك أو فمك لحد ما تغسل إيديك، مهم تتعرفوا على نصائح علمية عن كيفية ممارسة المسافة الآمنة في زمن “كورونا”، وده اللي بنطلق عليه “التباعد الاجتماعي”، خلال شراء المواد الغذائية الأساسية واللوازم الطبية، زي ما أوضحت صحيفة “الجارديان” البريطانية.

خليك على بعد مترين من العملاء والموظفين
بتوفر بعض السوبر ماركتس زي سعودي ومترو وغيرهم معقمات لليدين وتنظيف عربات التسوق، وبعد ما تقوم بالخطوة دي حاول تتعد عن الناس في طريقهم من وإلى المحلات التجارية، وجواها كمان، إن أمكن، ولازم تنتظر دورك للوصول للمنتجات في الثلاجات والمجمدات ورفوف الخضروات باقي رفوف المحل.

وبتساعد بعض محلات التسوق الكبيرة في القيام بذلك عن طريق الحد من عدد الأشخاص اللي ممكن يكونوا داخل السوبر ماركت في أي وقت.

وعند الشراء، حاول أن تبقي على مسافة من الموظفين والعاملين في المتجر أيضا، وكذلك عن المحاسبين في نهاية عملية التسوق.

تسوق بمفردك

بلاش تاخد معاك أطفال أو أي حد من أفراد الأسرة أثناء التسوق، وده هيؤدي بدوره لتقليل عدد الأشخاص داخل المتاجر، ودي هيخلي مسافة التباعد بين الناس في المحلات أسهل.

وخليك فاكر دايمًا أن الدراسات بتشير إلى أنه في المتوسط، ممكن يصاب الأشخاص بمرض “كوفيد-19” لمدة لا تقل عن 5 أيام قبل ظهور أي أعراض عليهم، وبالتالي ممكن نشر الفيروس طول الوقت من غير قصد.

شراء الضروريات والاحتياجات الأساسية بس

من الطبيعي جدًا الفترة دي، الناس تحس إنها معرضة للعزل الذاتي في البيوت لمدة 14 يوم، وعلشان كده بيسعوا بجنون لتخزين السلع الغذائية، لكن خد بالك إن هستيريا الشراء هيكون نتيجتها نقص المواد الغذائية والمنتجات الطبية للأشخاص اللي بيعتمدوا عليها، وعلشان كده اشتروا بس الحاجات الأساسية.

وفيه تقارير حاليًا عن زيادة هدر الطعام، بسبب إن الناس بتقوم بتخزين سلع قابلة للتلف.

استخدام خدمات التوصيل أفضل
لازم تعرفوا إن كل ما قل عدد الناس في الشوارع والمتاجر، قل احتمال انتقال الفيروس بين الناس، ولو كان بإمكانك الحصول على خدمات التوصيل، ده هيقلل من عدد المرات اللي هتنزل فيها من البيت، وده في مصلحتك ومصلحة باقي الناس.

عدم نزولك كتير هيساعد على إبطاء، وتخفيف، ذروة العدوى بين السكان اللي بتسبب القلق للسلطات والعلماء.