The Definitive Guide to Living in the Capital , Cairo , Egypt

أرقام غريبة جدًا جدًا سمعناها لما حبينا نتواصل مع منظمين فعاليات، سواء أفراد أو شركات لتنظيم حفلة سبوع للبيبي، كل اللي طلبناه حاجات بسيطة لحفلة على الضيق في البيت، شوية زينة، على كام علبة سبوع، على كام بالونة، مسائل بسيطة جدًا، سمعنا أرقام عالية جدًا بتوصل لعشر آلاف جنيه أحيانًا! ده من غير فشار ولا أي حاجة، طبعًا كانت صدمة.

قررنا ننزل درب البرابرة، نأخذ فكرة ونعرف الأسعار، وفعلًا نزلنا وعرفنا أن فيه فرص كثير للأباء والأمهات الجدد أنهم يشتروا السبوع جاهز وينقلوه من هناك أو لو لهم مزاج يشتروا الخامات ويعملوها بنفسهم.

المحلات هناك كثيرة جدًا والاختيارات رائعة ومميزة وكل تفاصيل السبوع من الأبرة للصاروخ موجودة، منخل البيبي، وكمان فيه ابتكارات ثانية لشكله زي أنه يبقى سرير أو عربية صغيرة وخلافه، وكمان الأبريق والقلة والشمع وعلب السبوع على اختلافها والحلويات واللعب وكل حاجة.

لو هتشتروا السبوع جاهز، يعني العلبة مقفولة وفيها البونبوني، والشوكولاتة واللعبة أو  التحفة والكارت اللي فيه اسم البيبي وتاريخ ميلاده، وكمان شريطة ستان فيونكة عليها اسمه، فأنتم بتتكلموا في أسعار بتبدأ من 10 جنيه للعلبة وبتطلع لحد 50 جنيه حسب الشكل والنوع وقيمة التحفة، شوفنا اختيارات كثير جدًا عجبتنا، وفعلًا بتأخذ الحاجة مقفولة وفي وقت قياسي جدًا من وقت الاتفاق تقريبًا ثلاث أيام بالكثير.

فيه إمكانية ثانية أنكم تشتروا الخامات وتعملوها بأيديكم، والموضوع سهل، العلب متوفرة بكل الأشكال وتقفيلها مافيش أسهل منه، أسعارها من أول الـ 100 كيس بـ 20 جنيه، لحد سعر العلبة الواحد 10 جنيه، حسب الشكل والخامة، وكمان التحف والخامات فرداني، لكن اللي اكتشفناه أنكم لو سألتم عن سعر الخامات عند محل هتسمعوا سعر، لكن لو عرف أنكم هتشتروها لوحدها من غير الحلويات هيقول لكم سعر ثاني خالص. لكن خلينا نقول أن نوعيات الحلويات سيئة ما عجبتناش ومافيش بينها اختيارات كثير، هي نفس النوعيات عند الكل.

إحنا فكرنا في فكرة أننا نقفل حاجة السبوع بأيدينا، في البداية تصورنا أن ده هيوفر، لكن بمقاييس وأسعار هناك عمرهم ما هيسيبوك توفر أبدًا، وعلى هذا الأساس فكرنا أنه الموضوع صحيح مافيهوش توفير زيادة لكن فيه حميمية وحب، لو هتعمل سبوع البيبي بأيده تختار هتحط إيه في العلبة وإزاي وبأنهى طريقة وهتكتب للناس إيه، لكنها مميزات مش هيقدر صاحب المحل يوفرها لو العلبة جاهزة، على هذا الأساس بدأنا نسأل.

لو هتجيبوا التحف لوحدكم فالأسعار مختلفة، فيه حاجات بـ 20جنيه، وحاجات 30 وحاجات بـ 40 وحاجات بـ 50 وحاجات أغلى كمان، نصيحتنا لكم لفوا بالراحة، وما تخلوش الألوان والبهرجة تخطفكم ولا المحلات اللي في أول السوق تأخذكم، ادخلوا جوه أكثر واسألوا على الأسعار واكتبوها وقارنوا، إحنا اشترينا حاجة وكانت في المحل اللي جنبها أقل وهكذا.

المكان مش بس فيه حاجة السبوع لكن كمان حاجة الزينة، وكل تفاصيلها من بلالين بكل الألوان ولعب، وحروف تلمع باسم البيبي، كل حاجة ممكن تتخيلوها وبـ تشوفوها بأسعار خيالية هناك بأسعار مش رخيصة لكن كمان مش بشعة زي ما بتشوفوها بره، يعني جملة “Welcome Baby” حروف على شريط ستان عريض بـ 25 جنيه، أشكال مختلفة بتشير أن المولود ولد أو بنت بتبدأ من 10 وتنتهي عند 20 و50 جنيه.

ممكن تجيب تحضيرات ظريفة وحلوة للسبوع لو حد جه عملها لك هـ تكلفك أكثر بكثير.

أحسن حاجة فى درب البرابرة التنوع وإمكانية الاختيار بين أشكال ومستويات سبوع كثير، بس تفاوت الأسعار الكبير بين محل والثاني والمستوى المنخفض للحلويات المعروضة نقطة مش لطيفة، فى الآخر لف بالراحة وخليك صبور وهادئ، وصور الحاجات اللي تشوفها وبعد ما تستقر اشتري وفاصل براحتك وخفض خمسة جنيه على الأقل.