The Definitive Guide to Living in the Capital , Cairo , Egypt

كل سنة وأنتم طيبين، رمضان جري بسرعة ولا حسينا به، دائمًا الحاجات الحلوة بـ تخلص بسرعة، وطبعًا قبل ما يخلص لازم نستعد للعيد وكحك العيد، اللي زمان الأسر المصرية كانت بـ تتجمع وتعمله بنفسها، وتبقى فرحته فرحتين، فرحة تصنيعه والتفنن في عمله وفرحة قدوم العيد السعيد، بس طبعًا بمرور الزمن والانفتاح مع ضيق الوقت، الواحد بقى بـ يشتريه جاهز أسرع وأحلى وتوفيرًا للمجهود، علشان تظهر لنا مشكلة ثانية، يا ترى إيه أنسب الأماكن لشراء الكحك؟ قلنا نوفر عليكم الحيرة دي ونجيب لكم أفضل 10 أماكن بـ تعمل كحك من وجهة نظرنا.

 

1-العبد:

من أشهر المحلات المعروفة بجمال الكحك بتاعه وجودته سواء السادة أو اللي محشي بالمكسرات، وتلاقي عليه زحمة جبارة من قبل العيد، وممكن مش كل الناس تعرف أنه بـ يبقى عنده كل أنواع الحلويات الشرقية والغربية، ومن أكثر الحاجات الثانية اللي مشهور بها الآيس كريم بتاعه، وكمان هو له فرعين: في المهندسين وفرعه المشهور في وسط البلد.

 

2- عبد الرحيم قويدر – Abdel Rahim Koueider:

طبعًا مش هـ نتكلم عن جمال حلويات قويدر، بالذات الغريبة اللي شكلها مغري جدًا والكحك اللي مش قادرين نستنى لآخر رمضان علشان نذوقه، عبد الرحيم قويدر قدر يكون سمعة طيبة له برغم كل التحديات اللي في السوق، علشان يبقى من أحسن صناع الحلويات الشرقية في مصر، وتقدروا تتابعوا فروعه من خلال صفحتهم على الفيسبوك.

 

3-تسيباس:

من وإحنا صغيرين لازم ندوق الكحك بتاع تسيباس اللي لسه محتفظ بجودته برغم طول المدة دي، مش هـ نتكلم عن تنوع الحلويات عنده بس اللي لازم نقوله أن الكحك عنده له طعم ثاني ومش غالي وبكل أنواع المكسرات اللي تتخيلوها، وكمان عامل كحك بالملبن غير البيتي فور والغريبة اللي برضه فيه منها محشية مكسرات، له فروع كثير قوي في مدينة نصر والهرم والرحاب والمهندسين.

 

4- تورتينا – Tortina:

هم دائمًا معروفين بجمال حلوياتهم المختلفة بس كمان هم دائمًا بـ يبهرونا بإضافتهم الغربية اللي بـ يحطوها على الحلويات الشرقية، إليكم المفاجأة تورتينا عمل كحك بالريد فيلفت يا جماعة، يا ترى هـ يخترعوا إيه بالريد فيلفت بعد كده؟ الله أعلم. ولو عاوزين تعرفوا فروعهم الثانية تابعوا صفحتهم على الفيسبوك.

 

5- لابوار – La Poire:

لابوار تعتبر من أوائل الناس اللي نزلت بكحك العيد، ده غير البيتي فور والغريبة والحقيقة أن لابوار فعلًا متعنا بحلوياته الشرقية السنة دي، ومستنين منه الأفضل دائمًا، وله فروع كثيرة في الهرم و6 أكتوبر ومدينة نصر والزمالك.

 

6- ساليه سوكريه – Salé Sucré:

لو حبينا نتكلم عن الدقة في صنع الحلويات وجمال تفاصيلها وطعمها اللي يجنن، أكيد ساليه سوكريه أول مكان هـ نتكلم عنه، مين فينا يقدر يستغنى عن الكنافة بالمانجو اللي بـ يعملها، والسنة دي هل علينا بعلبة كبيرة جدًا بمناسبة العيد فيها كحك العيد وبيتي فور وغريبة، كله في علبة واحدة علشان يوفر عليك التعب، وعلشان تعرف المكان الأقرب لك تابع صفحتهم على الفيسبوك.

 

7- بسكو مصر:

طبعًا مخبوزاتهم مش محتاجة حد يوصف جمالها وأسعارها، منتج مصري 100% وبجودة عالية، أكيد طعمه هـ يبقى مختلف جدًا ومميز.

 

8- ديوكس – Dukes:

السنة دي ديوكس تعبنا معاه من جمال الحلويات اللي بـ يقدمها برغم أنه ما بقالوش كثير في عالم الحلويات، إلا أن مافيش حاجة بـ يعملها وحشة، فـ تخيلوا الكحك بتاعه هـ يبقى عامل إزاي؟ والجديد السنة دي من ديوكس أنه عمل لنا كحك بكل الألوان أحمر وأخضر وأصفر وتقدروا ترشوا عليه السكر براحتكم ده غير أنواع الكحك نفسه والبيتي فور والغريبة، وله فروع في مدينة نصر والمهندسين والتجمع الخامس وهليوبولويس.

 

9- لامندين – Lamandine:

طول عمر لامندين بـ يبهرنا بحلوياته، صحيح السنة دي ما أخدش حقه قوي في الدعاية وسط المحلات الكثيرة، بس الأكيد أننا مش قادرين نستنى لحد ما نجرب الكحك بتاعه. ولهم فروع في الدقي والمعادي وهليوبولوس.

 

10- لو كرنفال – Le carnaval:

لو كرنفال وحلوياته العظيمة وأسعاره الأعظم، مش عارفين نتكلم عن إيه ولا إيه من حاجاته الجميلة، بس الأكيد أن الكحك بتاعه مختلف وطعمه جميل، وله فروع في الدقي ومصر الجديدة.

 

طبعًا أهم حاجة في العيد لمة العيلة والشعور بالدفء ما تحرموش نفسكم من الإحساس ده لأي سبب في الدنيا اختياري، لأن الحاجات دي ما بـ تتعوضش هـ تفضل أجمل ذكريات في حياتك… وكل عيد وأنتم بخير وسعادة!