The Definitive Guide to Living in the Capital , Cairo , Egypt

الواحد مش متعود على فكرة الشنط الرجالي، وخصوصًا أن الحاجات اللي ما يقدروش يخرجوا من غيرها مش هتخرج عن المحفظة، نظارة الشمس، المفاتيح والموبايل. ولكن سرعة رتم الحياة في القاهرة والزحمة يخلوا أي حد ما يعملش كذا مشوار في اليوم الواحد، أو على الأقل يخرج من بيتهم معاه كل حاجة في شنطة واحدة فيها كل احتياجاته علشان يقضي اليوم كله "من بره بره".

في مقالات كثير تكلمنا عن الشنط بشكل عام –للبنات أو الشباب- وتجيبها منين وبكام، بس المرة دي هنتكلم أكثر عن الشنط الرجالي، ودي 5 أماكن بتبيع شنط رجالي في القاهرة:

 

رافين  – Ravin’:

من المحلات اللي بتتميز بأسعارها المناسبة لكل الميزانيات سواء للشباب أو البنات، وهو منتشر في مناطق كثير في أنحاء القاهرة زي مصر الجديدة، وسط البلد والمعادي. المجموعة اللي لاقينها عندهم كبيرة جدًا ومتنوعة، ومش بس كده ده كمان أسعارها هي الأحسن وسط المجموعة الموجودة في المقال ده.

أسعار الشنط اللي لها ذراع واحد بتبدأ من 69 جنيه وده سعر أصغر حجم. وبنفس السعر –بعد التخفيض- فيه حجم أكبر، ولكن بخامة مختلفة وعليها رسومات. أما الأغلى في النوع ده فسعره 179 جنيه وهي حجمها كبير نسبيًا عن الشنط الثانية، ده غير خامتها المختلفة –جلد أسود- ونعتقد أن حجمها مناسب ويستوعب حاجات كثير.

أما الشنط اللي بتتشال على الظهر، فالمجموعة شكلها أحلى بكثير من وجهة نظرنا؛ لأن شكلها شبابي بمجموعة النقوش الهندسية اللي بألوان متنوعة. المجموعة دي فيه منها عليه تخفيض سعره 99 جنيه، ومنها اللي بـ 149.99 جنيه  وهي بكنار من الجلد البني في الشنطة من تحت.  أما اللي فيها جزء سادة وجزء منقوش فنازل عليهم تخفيض من  149.99 جنيه لـ 99.99 جنيه و119.99 جنيه. فيه مجموعة كمان من القماش بس –وده شكلهم عجبنا جدًا- سعرهم 139.99 جنيه.

دي صفحتهم على الفيسبوك، وده موقعهم.

 

زارا – Zara:

من الأماكن المشهورة واللي بتتميز بقطعها المختلفة عن أي مكان ثاني. بالرغم من أن الأسعار مبالغ فيها حبتين ثلاثة، إلا أننا نعترف أن تصميمات مجموعة الشنط المعروضة مختلفة فعلًأ.

فيه مجموعة كلاسيكية خامتها من الجلد الصناعي باللونين البني والأسود، المجموعة دي فيها شنطة هاندباج تنفع للسفريات السريعة سعرها 699 جنيه. أما لشنط كل يوم، فيه اللي بذراع واحد وهم شبه شنط اللاب توب لحد كبير؛ واحدة تصميمها بسيط سعرها 499 جنيه وهي أصغر من التانية اللي خطوطها أقوى وشكلها يستحمل سعرها 599 جنيه.

من نفس المجموعة فيه شنط بتتشال على الضهر وستايلها عتيق Vintage بسعر 799 جنيه. وواحدة ثانية من القماش لونها زيتي وذراعتها من الجلد سعرها 499 جنيه.

أما المجموعة الرياضية، فمنهم بنقشة لبس الجيش باللونين النبيتي والأزرق، وهم بدراع واحد ولكن بتتشال على الضهر سعر الواحدة 399 جنيه، وبنفس السعر فيه واحدة كحلي قماشها مبطن.

دي صفحة الفيسبوك الخاصة بزارا، وده الموقع الخاص بالمحل.  

 

بول & بير – Pull & Bear :

مجموعة بول & بير بتتميز بتصميماتها الكاجوال البسيطة اللي تقدر تروح بيها أي حتة. متوفر عندهم مجموعة من الشنط اللي بتتشال على الضهر، وهي مصنوعة من البولييستر وسعرهم مناسب جدًا 179 جنيه.

أما الشنط المصنوعة من الجلد الصناعي فسعرهم أغلى حبتين؛ منها واحدة جلدها مبطن بسعر 349 جنيه، أما العادية منها فسعرها 399 جنيه.

وبجانب المجموعة الكاجوال دي، هتلاقي مجموعة من الشنط الرياضية اللي قماشها خفيف، منها واحدة لونها أسود قابلة للطي وبتتشال على الضهر بسعر 259 جنيه. ده غير أن فيه مجموعة من الشنط المناسبة للسفريات السريعة منها الهاند باج بسعر 349 جنيه ومنها اللي بتدكك من فوق زي الشوال وهي بنفس السعر.

دي صفحة الفيسبوك الخاصة ببول & بير، وده الموقع الخاص بيهم.     

 

بيرشكا  – Bershka:

هي مجموعته ما تختلفش كثير عن المجموعة المكان اللي قبله، وحتى الأسعار تقريبًا مش رايحة بعيد عن بول & بير. مجموعة الشنط اللي بتتشال على الضهر مصنوعة من الجلد الصناعي ومتوفر منها لونين البني والأسود وهم بسعر 399 جنيه. من نفس الخامة فيه واحدة بتتشال على الضهر برضه ولكن بتصميم مختلف؛ هي أصغر حجمًا من النوع الأول وبتدكك من فوق ولها جيب أمامي بسوستة، أما سعرها فهو 249 جنيه.

فيه مجموعة رياضية بذراع واحد ولكن بتتشال على ضهر، بتتميز بشكلها المستطيل وألوانها الرمادي والبرتقالي اللامع سعرها 449 جنيه. أما لو أنت بتدور على حاجة شكلها ولونها بسيط ومصنوعة من القماش، هتلاقي واحدة مصنوعة من القطن باللون الكحلي الغامق سعرها 349 جنيه.

اتفرج على المجموعة الكاملة من هنا. ودي صفحتهم على الفيسبوك.