The Definitive Guide to Living in the Capital , Cairo , Egypt

تسوق -
مقترح

دليل ياميش ومكسرات رمضان 2011

دليل ياميش ومكسرات رمضان 2011
بواسطة
Waleed Abuarab

عادة الناس بـ تستقرب وتجيب لوازم رمضان من ياميش
ومكسرات وخلافه من أقرب سوبر ماركت أو مقلاة جنب البيت، بس لو كنت بـ تحب الطقوس
وشايف أن شراء أي حاجة لها علاقة برمضان لازم يكون له مشوار خاص به وجو احتفالي معين،
أو كنت شايف أن الحاجات دي ما ينفعش تشتريها من أي مكان والسلام؛ إنما لازم يكون
محل كبير وله اسمه وسمعته، يبقى المقال ده علشانك.

هـ نتكلم هنا عن أهم أماكن بيع الياميش والمكسرات في
كايرو، وطبعًا معظمها أماكن مشهورة بالفعل مش هـ يزيد دورنا غير أننا نلقي الضوء
عليها أو نفكركم بها.

الموفق هو أهم محل متخصص في المكسرات والتسالي في مصر، الفرع الرئيسي موجود في
الزمالك في شارع 26 يوليو قبل محطة بنزين موبيل، وله زي أكشاك بيع صغيرة في
المولات الكبيرة وفروع كارفور ومترو ماركت، أسعاره أغلى شوية من المعتاد، لكنه
مميز ببعض أصناف المكسرات غير التقليدية مش هـ تلاقيها في أي محل ثاني، زي البندق
بالكراميل والكاجو بالكراميل والحمص الملون، ده طبعًا بجانب ياميش ومكسرات رمضان
العادية.

أولاد رجب له أكثر من 10 فروع في القاهرة، بسهولة هـ تلاقي فرع
قريب منك، ولو كنت ساكن فين!

رصة البضائع بره المحل وشكلها يفتح النفس للأكل وللشراء
بكميات كبيرة وبأسعار معقولة، الظريف السنة دي كمان أنه عامل سحب على جوائز قيمة
لأي حد يشتري بقيمة 500 جنيه أو أكثر، يعني خذ حد ثاني معاك وأنت رايح تشتري لو مش
هـ تعدي الـ 500 جنيه.

العبد له فرعين في شارع طلعت حرب وشارع شريف في وسط البلد، صحيح هو مشهور أصلًا
بالحلويات الشرقية –اللي لها علاقة برمضان طبعًا– لكنه كمان بـ ينزل كل لوازم
رمضان، وعرفنا من أسر مصرية كثيرة أن ده مكانهم المفضل لشراء الياميش والمكسرات كل
سنة، وطبعًا بـ يعتبروه رقم واحد في الموضوع ده.

سكان الجيزة والهرم عندهم كنز في شارع فيصل اسمه علي
ماركت
بـ يعرض كميات مهولة من البلح والياميش بأسعار خيالية، وعلى طول زحمة
جدًا، بس البائعين هناك شاطرين وبـ يمشوا الزبائن بسرعة، وبطول شارع فيصل فيه
محلات ومقلات كثير جدًا، يعني نقدر نقول الشارع يعتبر سوق ياميش وفوانيس في حد
ذاته.

كل فروع مترو ماركت بـ تعمل شنط خاصة برمضان أنت
بـ تحدد محتوياتها والكميات فيها حسب اختيارك، وبأسعار أقل شوية من أسعار المحلات
العادية، ممكن تتصل بهم وتحدد كل طلباتك وتعدي تأخذها من أي فرع وتدفع الفلوس.

في منطقة السيدة زينب وسوق الاثنين هـ تلاقي نفسك
مش عارف تجيب إيه ولا إيه! سوق حيوي جدًا لكل ما له علاقة برمضان، والمتعة
الحقيقية هناك هي الجو الروحاني المميز للمكان والأنوار المُعلقة، وكل محل فارش
بضاعته مترين أمام باب المحل، طبعًا المكان زحمة جدًا وهـ تمشي بصعوبة ده لو عرفت
تمشي أصلًا، بس ما ننكرش أننا استمتعنا بزيارتنا للمنطقة دي.

في العتبة وبعد كوبري الأزهر شمال هـ تلاقي محلات رجب
العطار
، هو أصلًا عطار بس في رمضان بـ يجيب بضاعة “إكسترا” زي ما بـ
يقول. فيه كمان التميمي في وسط البلد في ميدان باب اللوق، من علامات
الياميش في المنطقة، ولو كنت قريب من المنيل ومصر القديمة فيه محلات الدمياطي،
وفروع سوبر ماركت المحمل منتشرة في مصر الجديدة وجسر السويس ومدينة نصر
والمقطم وكلها بـ تعمل عروض خاصة لرمضان وأسعارها منافسة، وطبعًا سبينيز في
«سيتي ستارز»، وأخيرًا وليس آخرًا كل فروع كارفور في المعادي والعبور وطريق
إسكندرية الصحراوي.

الأسعار بـ تختلف من مكان للثاني حسب جودة البضاعة أو
المنطقة اللي بـ يُباع فيها، لكن الفروق مش كبيرة في النهاية، وسهل أنك تقرر إذا
كانت الحاجة تستاهل الفلوس دي ولا لأ لأن معظم المحلات بـ تسمح لك أنك تجرب وتتذوق
الياميش والمكسرات إلا لو كان عبوات مغلفة طبعًا.

البلح أسعاره بـ تكون 9 و10 و11 جنيه للكيلو وممكن يبقى
13 جنيه لو مغلف أو مستورد، المشمش المجفف أو المشمشية أسعارها ما بين 34 لـ 40
جنيه للكيلو، البرقوق المجفف أو القراصيا بـ يتراوح بين 20 و25 جنيه الكيلو، التين
المجفف بـ يتباع باللفات، واللفة أقل من الكيلو بشوية، وسعرها بـ يبقى 22 و24 و26
جنيه، وقمر الدين من 10 لـ 16 جنيه للورقة أو اللفة، بس بـ ننصحك تشتري الأغلى
علشان الأنواع الرخيصة بـ يبقى طعمها مش مشمش صافي وبـ تبقى مخلوطة بالجزر أو
مكسبات الطعم الصناعية.

أسعار المكسرات أغلى شوية؛ البندق المقشر الكيلو بـ 52
جنيه لغاية 60 جنيه، اللوز بـ 48 جنيه، عين الجمل بـ يبدأ من 76 جنيه لحد 89 جنيه
في السوبرماركت، والزبيب أشكال و ألوان كثير وأسعاره بـ تبدأ من 22 جنيه لحد 30
جنيه للكيلو، وأخيرًا جوز الهند بـ 22 و23 جنيه للكيلو.

طبعًا مافيش حد بـ يشتري الحاجات دي بالكيلو! هو ربع
كيلو من كل حاجة يبقى كويس قوي وبـ يكفي طول الشهر لو الاستخدامات مش هـ تزيد عن
الخشاف وكام صينية كنافة وقطايف. أنما لو كنت من هواة قزقزة المكسرات والياميش وأنت
بـ تتفرج على المسلسلات يبقى هـ تدفع فلوس كثير في مخزون الياميش السنة دي.

اللهم ما بلغنا رمضان.

مقترح