The Definitive Guide to Living in the Capital , Cairo , Egypt

رنا شرف

فاكرين فيلم “تشارلي ومصنع الشوكولاتة” الكلاسيكي الشهير؟ تخيل نفسك في عالم جميل كل تفاصيله من الشوكولاتة والمارشيملو والبنبون وكل الحاجات المسببة للسعادة، ده اللي هتلاقيه لو قررت تزور “ديسابسيتو”، براند الشوكولاتة المصري اللي عمل مؤخرًا مكان متخصص لعشاق الشوكولاتة والكاندي والحلويات في القاهرة الجديدة، وبالتحديد في التجمع.

هنعرفكم في السطور الجاية على تفاصيل زيارتنا لعالم “ديسباسيتو”.

 

بمجرد دخولك للمكان هتحس أنك دخلت عالم مدهش من السعادة، اللون البينك مسيطر في كل أركان المكان، وفيه جزء كبير مليان كاندي لعشاق الكاندي والبنبوني.

هتلاقوا في المكان كل أنواع الشوكولاتة، من أول الدارك لحد النكهات كلها، زي الفروالة والشوكولاتة البيضاء والبرتقال وأكثر، وطبعًا موجود شوكولاتة بكل الأشكال والأحجام.

“ديسباسيتو” كمان فيه مخبوزات زي الكرواسون والباتيهات والجاتوهات، ده غير الحلويات الشرقي زي الكنافة والبسبوسة وأكثر.

نقدر نقول إن المكان فيه كل حاجة تقريبًا تخص مملكة الحلويات.

إحنا هناك جربنا الشوكولاتة الدارك بالفروالة، ودي عجبتنا جدًا وحسينا إن جودتها عالية وسعرها معقول 60 جنيه، وكمان جربنا الكاندي، وده سعر الكيلو منه 300 جنيه، وكان أكثر من رائع.

“ديسباسيتو” هيعجب كل عشاق الشوكولاتة والحلويات، وتجربتنا هناك كنت مميزة ومبهجة وعجبتنا لحد كبير وأكيد هنكررها تاني.

المكان فيه كيدز إيريا للأطفال.

ديسباسيتو موجود في التجمع، في الجولد سكوير، مول مصر المحروسة، في التسعين الشمالي.