The Definitive Guide to Living in the Capital , Cairo , Egypt

يمنى ومرام تقابلوا فى الجامعة الألمانية بالقاهرة وكانول عاملين مشروع عن “تصميم المنتجات” وكانت فكرة “ريشايكل” بدأت تتشكل معاهم، شغلهم عرض لأول مرة فى الجامعة الألمانية فى آخر نصف عام دراسي فات، ولما لقوا رد فعل إيجابي على شغلهم وناس كثيرة كانت بـ تسألهم عليه قرروا يطلقوا ابتكارهم ده لعالم البيزنس، ومن وقتها وهما شغالين من نار وعرضوا شغلهم فى “بيكيا” وبازار “السوق” اللى كان فى نهاية شهر أغسطس، صفحتهم على الفيسبوك وصلت إلى 200 Like بعد شهر واحد بس من إصدارهم للمشروع، ألوان وخيال منتجات مشروعهم بـ تجذب اهتمام الناس بسرعة كبيرة.
“ريشايكل” بـ تقدم منتجات مصنوعة باليد وأصلية وكل واحدة فيها متميزة عن الثانية، أفكارهم بـ تيجي لهم من الحاجات اللى بـ يشتروها من زيارتهم لسوق السلع المستعملة، وكمان من ملاحظتهم إزاي الناس البسيطة بـ تستخدم عناصر مختلفة فى حياتهم اليومية، فمثلاً ابتكروا طقم مقاعد واحد مصنوع من طبلية عليها مخدة روشة، وكمان نجحوا أنهم يبتكروا تصميم مودرن لقدرة فول، فيه كمان عندهم تشكيلة وحدات إضاءة غير تقليدية وترابيزات قهوة وشنط وإكسسوارات للبيت وحلول عملية للتخزين، كل تصميماتهم ممكن تطويعها علشان تناسب احتياجاتك وذوقك. بالمقارنة بفنانين ثانيين معروفين أسعارهم معقولة، فى وقت زيارتنا لقينا سعر ترابيزة عندهم بزخرفة وتصميم بـ 12 جنيه لحد 480 جنيه للأحجام الأكبر والأكثر تميزًا.
البنات فى “ريشايكل” مش بس بـ يصمموا قطع جذابة، دول كمان عندهم رؤية وهدف أنهم يعرفوا الناس فى القاهرة أهمية إعادة التصنيع من خلال مشروعاتهم.
متوسط مخلفات الأسرة الواحدة في مصر 5 كيلو شهريًا، وده مش بـ يتضمن قطع الأثاث، وطبعًا مشكلة القمامة في القاهرة متفاقمة وواضحة للجميع بسبب الزيادة السكانية وزيادة معدل الاستهلاك. ناس كثير بـ تشتري منتجات أكثر وبالتبعية بـ يتخلصوا من متعلقاتهم الأقدم. والمشكلة مش في القمامة اللي بـ نشوفها بعينينا وبس، المشكلة في الغازات المتصاعدة نتيجة تحللها واللي بـ تزيد من مشكلة الاحتباس الحراري وكأن مصر ناقصة ارتفاع في درجات الحرارة. فبقدر قليل من الابتكار والمجهود من الجميع كمية النفايات “الصالحة لإعادة التدوير” هـ تقل. من خلال تحديث وتجديد العناصر القديمة المهملة، مش بس كمية القمامة هـ تقل؛ ده الطلب على المواد الخام هـ يقل هو كمان وده بدوره بـ يساعد على الحفاظ على البيئة ومواردها. يمنى ومرام أنشأوا خدمة اللي من خلالها يقدروا يجمعوا كل الأدوات المنزلية وقطع الأثاث من كل الناس وبشكل شخصي ومجاني. وأنت بكده مش هـ تبقى بـ تساهم في المشروع الفني المبتكر للبنتين دول، لأ.. ده أنت كمان هـ تساهم في الحفاظ على البيئة بتجنب إضافة وحدة نفايات جديدة للتلال الموجودة بالفعل. ده غير أن الحاجة اللي أنت بـ تتخلص منها ممكن يبقى لها دورة حياة جديدة بشكل مختلف وفي مكان ثاني.