The Definitive Guide to Living in the Capital , Cairo , Egypt

يمكن ناس كتير بتتعامل مع الإكسسورات والملابس التكميلية والحلي والزينة على إنها شئ من الرفاهيات أو حاجه مش ضرورية، لكن فيه ناس تانية بتشوف في قطعة الإكسسوار أو الزينة دي إنها عمل فني أو استثنائي، وفي ناس تالتة خالص بقى بتتعامل مع قطع الزينة والحلي والإكسسوار دي على إنها بطاقة تعريف بالهوية أو بوابة صغيرة للثقافة والتراث اللي بيعبر عنها اللي لابس القطعة دي.

سامي أمين هو واحد من الناس اللي آمنت إن قطعة الإكسسوار أو الحلي مش بس للزينة، لا دي بتدي فكرة عن الثقافة والهوية اللي جاي منها الشخص ده، ولذلك في سنة 1997 بدأ في إانتاج أول تصميماته المتميزة باستخدام الجلد المطعم بالنحاس، واللي كانت في وقتها تجربة فريدة وجديدة في مجال الحلي والإكسسوار.

وبما إن سامي أمين من الفنانيين المؤمنين بتعبير الحلي عن الثقافة والهوية، فكان طبيعي إنه يستلهم أفكار إبداعاته من الثقافة والهوية المصرية الأصيلة، واستخدم عناصر ثقافية غنية، علشان يصنع القطع الفريدة دي، واحتفظ في نفس الوقت برؤيته الشخصية الجمالية والفنية.

وبكده يعتبر أمين أحد أبرز المصممين في مصر، وممكن يكون هو الأفضل لما نتكلم عن الأعمال الجلدية والنحاسية، ولكن على الرغم من كل ده، هتشوف إن أسعاره معقولة جدًا، بالذات لو قارنتها بمنتجات تانية في السوق.

ممكن تزور الموقع الخاص بتصميمات سامي أمين، أو تزور صفحته الرسمية على الفيس بوك من هنا. وممكن تزور  معارض سامي أمين في الزمالك وجاليريا 40.