The Definitive Guide to Living in the Capital , Cairo , Egypt

ومين ما بيحبش الشوكولاتة؟! سر السعادة على الكوكب، والأكلة اللي ممكن نديها لحبايبنا لما نكون عاوزين نقول لهم إننا بنحبهم بجد! تعالوا نعرفكم على 5 أماكن بيوفروا أحلى شوكولاتة في العاصمة المصرية.

 

  Passionelle

واحد من أشهر محلات الشوكولاتة في مصر. بيتميز بأسعاره المعقولة وجودة المنتجات اللي بيقدمها. المكان بيوفر تشكيلة جميلة من الشوكولاتة، وسعر الكيلو بينقسم إلى 4 فئات أقل فئة فيهم 175 جنيه، وأعلى فئة 290 جنيه، وده على حسب الحشو، سواء لو كان بالبندق أو بحشوات تانية.

باشونيل له فروع كتيرة، من أشهرها الفرع الموجود في 82 شارع مصطفى النحاس بمدينة نصر.

 

Choco Chocola

من المحلات المشهورة لبيع الشوكولاتة في القاهرة، ومعروف بجودته العالية، ورغم إن أسعاره تعتبر عالية لكن جودته تستحق! والشوكولاتة عندهم جميلة جدًا.

كيلو الشوكولاتة هناك بـ 395 جنيه.

شوكوشكولا له فروع كتير في القاهرة، منهم فرع 11 شارع حسن صبري بالزمالك.

Swiza

من المحلات القديمة والمعروفة في العاصمة، وعنده تشكيلات مميزة من الشوكولاتة بأسعار بتبدأ من 220 جنيه للعلبة الكيلو، وعلبة الكيلو ونصف سعرها 300 جنيه.

سويزا له فروع كتير كمان، منهم فرع في 43 شارع لبنان بالمهندسين.

 

 Patchi

من الماركات المعروفة والغالية في القاهرة لما نتكلم عن الشوكولاتة، والحقيقة جودته مميزة وعنده تشكيلة كبيرة جدًا من الشوكولاتات، هو براند لبناني سويسري معروف جدًا.

سعر الكيلو 850 جنيه، وموجود في  21 شارع مصر حلوان الزراعي بالمعادي.

 

House of Coca

من المحلات المشهور، واللي بتقدم أنواع جميلة من الشوكولاتة، وله فروع كتير، وأسعاره ممكن تكون غالية شوية بس منتجاته تستحق! وهناك مش بس ممكن تشتري شوكولاتة، ده أنت ممكن كمان تشرب أحلى هوت شوكليت أو تاخد مولتون كيك.

عنوانه: شارع التسعين الشمالي، ماكسيم مول، التجمع الخامس، القاهرة الجديدة.