The Definitive Guide to Living in the Capital , Cairo , Egypt

الصورة الرئيسية: Prahant Designing Studio

الصورة الداخلية: عمر مراد

في وسط القاهرة القديمة، وتحديدًا في قلب حي الحسين، بيقع واحد من أقدم وأشهر الأسواق في مصر والعالم؛ “خان الخليلي”. بين الأزقة الضيقة والممرات المرصوفة بالحجر، هتلاقي عالم متكامل من الفضة، فيه جمال الصناعة المصرية القديمة، وسحر التفاصيل اللي مبتنتهيش.

الفضة في خان الخليلي مش مجرد إكسسوارات، دي حكايات محمولة على سلاسل وأنسيالات وخواتم، كل قطعة وراها شغل يدوي دقيق، ومهارة بتتعلمها الأجيال من بعض.

إيه اللي ممكن تشتريه من هناك؟

في خان الخليلي هتلاقي كل حاجة مصنوعة من الفضة؛ خواتم، سلاسل، أنسيالات، حلقان، ولاعات، سبايك صغيرة، وحتى هدايا محفور عليها أسماء أو تواريخ خاصة.

فيه كمان قطع على شكل نُسخ مصغرة من معالم مصرية، أو نقوش مستوحاة من الفن الإسلامي والقبطي، وده بيخلي كل حاجة هناك مميزة جدًا لو ناوي تشتري هدية.

إزاي تفرق بين الفضة الأصلية والتقليد؟

دائمًا بص على العيار، وغالبًا هتلاقي ختم صغير مكتوب عليه “925” وده معناه إن الفضة أصلية بنسبة 92.5%.
الفضة الأصلية وزنها بيكون تقيل نسبيًا، ولونها بيكون أهدى من اللمعة الصناعية اللي بتكون في التقليد.
اسأل صاحب المحل عن مصدر الفضة وممكن تطلب فاتورة مختومة، خصوصًا لو المشتريات غالية.

ما يفوتكش كمان: في حضن التاريخ.. 5 حاجات ممتعة تقدر تعملها في خان الخليلي

طيب الأسعار عاملة إزاي؟

أسعار الفضة بتتغير حسب السوق وسعر الدولار والفضة الخام. بس عمومًا، الأسعار في خان الخليلي غالبًا بتبدأ من:

خاتم رجالي أو حريمي بسيط: من 150 لـ 400 جنيه.
سلسلة أو أنسيال متوسط: من 300 لـ 700 جنيه.
هدايا محفور عليها: السعر بكون حسب الوزن والتفاصيل والتصميم.

بس خد بالك، السعر بيتحدد حسب الوزن والعيار والتصميم. وممكن تفاصل مع البياع، بس حاول تكون عارف متوسط الأسعار قبل ما تروح.

أشهر محلات الفضة في خان الخليلي

محمود فضة: من أقدم المحلات هناك، عنده تشكيلة متنوعة من الفضة اليدوي.
محل النجار: متخصص في النقوش الدقيقة والكتابة على الفضة.
المغربي للفضة: بيقدم تصميمات حديثة وعصرية.
وكمان فيه كتير من الورش الصغيرة اللي بتعمل شغل يدوي حسب الطلب، وممكن تجهز هديتك في نفس اليوم.

نصائح سريعة هتفيدك قبل ما تروح:

روح الصبح بدري قبل الزحمة.
خليك لابس مريح، واستعد تمشي كتير.
ماتشتريش من أول محل، لف وشوف الأسعار.
لو ناوي تشتري كمية، اتفق على سعر الجرام.

وأخيرًا..

في النهاية، زيارة خان الخليلي مش بس تجربة تسوّق، دي رحلة في الزمن، وسط عبق التاريخ وريحة البخور والنحاس والمنسوجات. ولو اشتريت حاجة من هناك، غالبًا هتفضل محتفظ بيها سنين… لأنها مش بس فضة، دي قطعة من مصر.