The Definitive Guide to Living in the Capital , Cairo , Egypt

أول مرة شوفنا فيها شعبان ماكناش متحمسين على الإطلاق، لأننا شوفنا المحل بتاعه اللي كان عند مترو البحوث، شكله ماكنش مشجع أوي، وكلمة بواقي تصدير ماكنتش بتشجعنا قوي برضه لأن الأذواق في أوقات كتير كانت مش قوي، لحد ما في مرة جذبنا طقم خاص بالبيبيهات وإحنا معديين جمبهم، دخلنا نشوفه لاقيناه ماركة “كارتر” وفعلًا جالنا ذهول، لأنه كان بـ 60 جنيه فقط، طقم كامل، جاكت وتي شيرت وبنطلون، لطفل عمره ست شهور،  تجولنا في المحل بعدها  وبدأنا نتعرف على شعبان عن قرب.

المحل فيه هدوم لكل الأعمار، أطفال وحريمي ورجالي، بيتعامل مع الماركات المشهورة، خصوصًا في قسم الأطفال، على طريقة “أنت وحظك” يعني فجأة هتلاقي كمية من مقاس معين لشكل معين من ماركة مشهورة متوفر، لو المقاس مناسب كان بها، مش مناسب يبقى حصل خير لأن غالبًا مافيش مقاسات تانية والموضوع عبارة عن حظ بحت، الماركات زي بولو وكارتر وغيرها، وممكن اللي بعدها ماتلاقيش غير حاجات عادية بأسعار عادية برضه.

في شعبان الموضوع بالكامل خاضع للحظ، بختك يا أبو بخيت بس النتيجة بالنسبة للناس اللي بتحاول توصل لمعادلة لبس شيك بفلوس قليلة ممتازة، خصوصًا في لبس الأطفال، لكن الموضوع ده مش بيحصل مع لبس الكبار، سواء رجالة أو ستات إلا نادرًا جدًا، لأن المعروض في الغالب ماركات مصرية أو مستوردة بسعرها السوقي أو أقل حاجة بسيطة، إلا لو كانت حاجات خاماتها مش قوية بيبقى سعرها بسيط.

شعبان له فروع كتير، أكتر فرع عجبنا هو الجديد بتاع ميدان الجيزة، واسع ومريح وتقسيمته ظريفة لحد بعيد، وييجي بعده فرع شارع الهرم، وإن كان الجيزة أسهل لناس كتير، أما فرع محطة البحوث فتقفل، إحنا جبنا تيشيرتات لأطفال قطن 100% بألوان لطيفة الواحد بـ 39 جنيه وكمان الشورتات الجينز لطيفة جدًا، وبرضه قطن 100 % وأسعارها أربعينات وستينات وتسعينات، نفس القطع شوفناها في أماكن تانية بأسعار مضاعفة.

ليكم لو هاتروحوا شعبان تبقوا فاضيين وعندكم صبر تفرزوا الهدوم، بلاش تاخدوا معاكم أطفال صغيرين، وحاولوا تروحوا على أوقات متقاربة علشان تقدروا تلاقوا الحاجات اللقطة، يعني لو معديين ادخلوا شوفوا مش هاتندموا.

العنوان:

فرع الهرم 282 شارع الهرم امام كايرو مول بجوار فندق زوسر

فرع الجيزة 5 شارع الجامعة بجوار عمر أفندي – ميدان الجيزة

وسط البلد 2 شارع البورصة الجديدة متفرع من شارع قصر النيل 

فرع مدينة نصر 1 شارع عبد الرازق السنهوري -عباس العقاد