The Definitive Guide to Living in the Capital , Cairo , Egypt

مع كل الظروف الاقتصادية الحالية كثير مننا بـ يحاولوا يتجاهلوها عن طريق التجول وسط مولات القاهرة الضخمة المكيفة علشان يشبعوا إدمانهم للشراء. “صن سيتى مول” فى هليوبوليس دلوقتي فى مراحل التشطيب النهائية، ويعتبر عادة اختيار العائلة الأول لقضاء يوم كامل فى الخارج.

ألوانه الحمراء والزرقاء المبهرة من الخارج، مع يافطة ضخمة مطلية مكتوب عليها  “صن سيتى”، أكيد بـ يميزوا المول العملاق ويخلقوا جو من الأناقة والذوق الرفيع. ورغم أن المول فيه جراج أربعة أدوار، بس برضه الشارع دائمًا فيه صفوف من العربيات، كأن القاهرة ناقصة زحمة زيادة! لما تدخل هـ تلاحظ أن الجراج مساحته مناسبة وسعره معقول؛ 5 جنيه لأول ساعة و3 جنيه لكل ساعة إضافية. التذاكر عبارة عن عملة صفراء صغيرة، فخلى بالك منها علشان لو ضاعت بـ تدفع 75 جنيه غرامة!

أول ما توصل لطريقك وسط الممرات هـ تلاقى نفسك محاصر تقريبًا بكل أنواع المحلات اللى ممكن تحتاجها؛ صن سيتى بـ يجمع بين محلات ملابس أطفال، ورجالى، وحريمى، وإكسسوارات، ومجوهرات، وأدوات منزلية، ومحلات كمبيوتر ومطاعم. طبعًا ما ننساش مملكة المرح فى الدور الثالث، واللى تعتبر مكان متكامل للتسلية، بـ يكملها مكان كبير على شكل غابة للأطفال، مع عربيات متصادمة وألعاب إلكترونية.

تقدر كمان تلاقى فرع كبير من فروع كارفور، واحد من أشهر السوبر ماركت فى مصر.

وزى أغلب الفوود كورت فى مصر، كل أسماء الأكلات السريعة الشهيرة فتحوا فروع لهم فى الدور الأرضى زى كنتاكى، هارديز، وطبعًا ماكدونالدز. منتشر كمان عدد من الكافيهات ومحلات الحلويات زى كوستا كافيه، وأينشتاين كافيه، وسينابون وأيس كريم كارفيل على سبيل المثال مش الحصر. لكل الناس اللى بـ تدور على وجبات أرقى، يقدروا يلاقوا عدد من المطاعم زى الاسم اللبنانى الشهير أبو السيد، والمطعم المعروف تشيليز، وأماكن بـ تقدم برجر زى Kook’s and Bigg’s ومكانى بالإضافة لأماكن ثانية.

صن سيتى كمان فيه فندق/ بوتيك خمس نجوم هو ذا غابرييل اللى مش بس فيه بار على حمام سباحة وملهى ليلى على الروف، وهو ده سبب تسميته المبتكرة روف بار، ده كمان بـ يقدم المطعم الفرنسى الراقى سولت. داخل المول بـ يقدم Cavallini  وجبات غالية وكوكتيلات بعد الساعة 10مساءً. تابع أجندة كايرو 360 علشان تعرف أحدث أخبار المكانين دول.

“صن سيتى” كمان بـ يوفر مزيج هائل من محلات الملابس والأحذية للرجال والسيدات؛ السلاسل المعروفة زى H&M، جاب، مونسون، ألدو، ناين ويست،Payless  وكلاركس من الأسماء المهمة فى المول، مع استمرار نجاح ماركات محلية زى سيفينتى كوتون، سيللينى وPlan B Clothing. الملابس الرياضية موجودة فى صورة أسماء معروفة زى بوما، نايك وأديداس. أكيد مش ناسيين الأطفال مع محلات زى Mothercare، Pumpkin Patch، وOkaidi بـ توفر كل احتياجات الأمهات، وكمان مجموعة كبيرة من ملابس الأطفال وألعابهم.

لو بـ تفرش أو بـ تجدد ديكورات بيتك وايت هاوس وأى-هاوس من الأماكن المفضلة لناس كثير خصوصًا أن مساحة العرض الكبيرة، تساوى أكثر من محل مجتمعين. تقدر كمان تروح على2b Computers وراية لو محتاج حاجة تخص الكمبيوتر.

تنوع المحلات الرائعة فى المول من النظارات للإيشاربات، والمجوهرات وحتى الساعات مالهاش نهاية. تقدر تلاقى أحدث النظارات من أشهر الأسماء العالمية عند جراند أوبتكس وC&Co. لو عاوزة تكملى مجموعتك من الإكسسوارات عندك أماكن هائلة زى لا فوال، تاى شوب، أكسيسورايز، أما داماس ومحلات للساعات والمجوهرات فـ يقدروا يقدموا لك مجموعة رائعة أنيقة بس غالية شوية. مزايا عنده أى حاجة تحتاجيها بالنسبة للعطور، والماكياج والمنظفات. تقدر حتى تلاقى صيدلية فى الدور الأول.

لو كانت دماغك بعيدة عن التسوق، عندك مجمع سينمات رويال رنيسانس داخل المول، بعد مدخل الجراج مباشرة، حتى مش محتاج تعدى على المحلات! علشان تعرف أكثر عن الأفلام ومواعيد العرض ادخل على دليل كايرو 360 لمواعيد العرض.

صن سيتى لسه فيه شغل ما خلصش لكنه بـ يتوسع بصورة كبيرة. رغم أن الدور الخامس هو أكثر دور فيه تطوير، الأربع أدوار الثانية مليانة بالمحلات والأسماء المعروفة، بدرجات متفاوتة طبعًا. صن سيتى بـ يقدم لعملاءه كل وأى حاجة تخطر على بالهم من المتعة، للمطاعم، للحياة الليلية، للملابس وحتى الأكل، وكله تحت سقف واحد.