The Definitive Guide to Living in the Capital , Cairo , Egypt

رنا شرف

تجمعات بيوت زمان كان لازم يكون فيها لعبة تجمع الشباب أو الاطفال أو حتى الأسرة كلها حواليها، زي الكوتشينة والسلم والثعبان. وكان دائمًا بيكون فيه حد من أفراد العائلة بيكون محترف في لعبة معينة منهم وبيعتبرها منطقته الخاصة اللي ماحدش ممكن ينافسه فيها.

وحتي وقت الإجازة والمصيف زمان، كان لازم يكون معانا الألعاب دي على البحر وفي الشاليه، خصوصًا في سهرات المصيف العظيمة حوالين الكاسيت وأغاني زمان.

ورغم إن ألعاب الموبايل المنتشرة الأيام دي متطورة ومبهرة أكتر، لكن الحقيقة إحنا لسة بنعتبر ألعاب زمان أجمل، وبتقرب الناس من بعض، وبتخلي فيه جو جميل في البيوت بنفتقده في الزمن ده.

تعالوا نفتكر مع بعض مجموعة من ألعاب زمان اللي ممكن تقرب كل أفراد الأسرة من تاني.

 

ليك في الكوتشينة ؟

بطلة ألعاب الزمن الجميل، ونجمة التجمعات والسهرات، وده لأنها بتجمع ناس كتير حواليها، أو ممكن اتنين بس يلعبوها.

والكوتشينة ليها أشكال لعب مختلفة، منها الشايب، ودي فيها الخسران بيتحكم عليه أحكام معينة ومعظمها كوميدية، وكمان بيخرج منها لعبة أستميشن، ودي بتتكون من 4 لاعبين وبيستخدموا فيها الورق، وبيكون اتجاه اللعب عكس عقارب الساعة.

حسابك كام في بنك الحظ ؟

دي كمان من الألعاب اللي بتجمع عدد كبير حواليها، وممكن تتلعب باثنين بس، وكانت من أكثر الألعاب شعبية في فترة الثمنينيات والتسعينيات واللي كنت لا تقل أهمية عن البلاي ستيشن النهارده، والحقيقة إن اللعبة دي كان هدفها تنمية روح التجارة وتعريف الناس بأهمية الفلوس والبيع والشراء.

اللعبة بتتلعب عن طريق إن كل لاعب بيستخدم قطعة بلاستيك وبيمشي علي بلاد مختلفة، وكل بلد لها رسوم جمارك، وتفاصيل أكتر.

لعبة جميلة هتلاقوا فيديوهات على يوتيوب بتشرحها بالتفصيل، وأكيد أطفالكم هيحبوها.

 

واحد شاي سكر بره ودومينوز!

من الألعاب اللي لسة مشهورة لحد النهارده وخصوصًا على مقاهي المناطق الشعبية، اللعبة لسة ليها جمهور كبير، وهي عبارة عن 28 قطعة مقسمة إلى نصفين، وبتتلعب عن طريق شخصين وكل لاعب بياخد 7 قطع والباقي بيتحط علي أرضية اللعبة وبيبدأ السحب.

إيه اللي جاب السلم جمب الثعبان؟

اللعبة دي كانت موجودة زمان في كل بيت مصري، وكانت من أكثر الألعاب شعبية، ولحد النهارده لسة ناس كتير بيحبوا اللعبة دي، يمكن لأنها لعبة سهلة وبسيطة.

بيلعبها شخصين، وبتتكون من مربعات مرقمة علي ورقة من الكارتون المقوى، مرسوم عليها سلالم بتربط بين المربعات وبعضها، وفي بعض المربعات التانية مرسوم ثعبان، واللعبة زي ما قولنا بسيطة ورسوماتها مبهجة وعلشان كدا محبوبة بين الأطفال.

تشتروا منين الألعاب دي النهارده؟

الألعاب دي كلها متاحة في محلات لعب الأطفال، وموجودة كمان على مواقع أمازون وجوميا ونون وبتوصلكم لحد باب البيت.

 

وأخيرًا..

دي كانت مجموعة من أشهر وأجمل ألعاب زمان، واللي بنتمنى ترجع تاني وسطنا وتجمعنا تاني وقت السهر والإجازات، بدل ألعاب الموبايل المرهقة للعين واللي بتقلل اللمة الحلوة.