The Definitive Guide to Living in the Capital , Cairo , Egypt

ثاني مرة نتكعبل في محل لبيع التابلوهات والأعمال الفنية في سيتي ستارز. أول مرة كانت في محل «كادر» اللي في الدور الأول في المرحلة الأولى في المول العملاق وكتبنا عنه مقال نقدي. المرة الثانية كانت محل «كلرز – Colours» الموجود في الدور الثالث. نفس شكل المحل الأولاني تقريبًا، لدرجة أننا افتكرناه هو هو المحل الأولاني “اللي كنا ناسيين اسمه وقتها” لكن بمجرد دخولنا المحل اللي أقرب في تصميم للأكشاك الزجاجية الكبيرة وبدأنا نستكشف المعروضات عرفنا أن كلرز مختلف.. مختلف فعلاً.

فاترينة عرض خارجية ممكن تشوف منها كل محتويات المحل من الداخل، تابلوهات ولوحات بكل الأحجام والمقاسات، على الجدران الخلفية للكشك الزجاجي، وعلى الأرض وعلى الأرفف، عدد كبير جدًا من اللوحات خليتنا مش عارفين نسأل على إيه ولا إيه، خاصة أن مافيش أسعار موضحة على المعروضات خالص. أعمال زيتية وحبر أسود وفحم، رسم على خلفيات قماش وخشب وورق. 90 % من المعروضات مستوردة من أسبانيا تحديدًا، ده على حسب كلام الموظف الوحيد الموجود في المحل، اللي بالمناسبة عجبنا موقع مكتبه في وسط المحل بين اللوحات الملقاة في كل الاتجاهات بطريقة فنية منظمة.

طبعًا مافيش داعي نقول أن كل الأعمال مش أصلية أو مش لفنانين معروفين، هي مجرد تابلوهات أنيقة تصلح لتزيين المنازل والمطاعم والمحلات والستوديوهات، لكن في نفس الوقت الحس الفني موجود في كل الرسوم والألوان المستخدمة، وسهل تلاقي عدد من اللوحات أقرب للتحف الفنية الجديرة بالاقتناء. على سبيل المثال مجموعة لوحات بمقاس 50×60 سم لراقصة فلامنكو بحركات مختلفة وبالألوان الأسود والأحمر، سعر التابلوه الواحد 1300 جنيه، بصراحة يستاهل؛ لكن الغريب أن رغم الفلامنكو والجو الأسباني اللي في المجموعة دي إلا أن اللوحات دي بالذات كانت صناعة مصرية ولرسامين مصريين. مجموعة مختلفة من اللوحات صغيرة الحجم مقاس 30×30 سم كانت عبارة عن رسوم شباشب بصباع بألوان مختلفة، مفتكسة ودمها خفيف، الواحد بـ 250 جنيه، غالي شوية بس برضه عندنا استعداد ندفع فيهم مبلغ كبير طلبًا للتفرد وبعض الكوميديا.

لو عاوز لوحات عملاقة هـ تلاقي، لو عاوزأحجام متوسطة موجود، لو عاوز صغيرة قد كف اليد موجود برضه، وفيه بجانب اللوحات عدد من البراويز وزوايا الجدران الخشبية “الزوي” بالألوان الذهبي والفضي والبني والأسود. كل حاجة بـ يبيعها “كلرز” هي الموجودة في العرض وبس، مافيش أي حاجة ممكن تطلبها عمولة أو صورة معينة تتعمل لك تابلوه بالحجم اللي أنت عاوزه، لكن الظريف أنك ممكن تستلم أي تابلوه في ساعتها وأنت واقف، مهما كان حجمه أو الكمية اللي أنت عاوزها.

عجبنا كم المعروضات اللي في “كلرز” وعجبتنا الخدمة المهذبة وطريقة العرض المنمقة اللي أتاحت لنا الفرجة على كل صغيرة وكبيرة في المحل. تجربتنا في «كلرز – Colours» كانت ممتعة للعين.