The Definitive Guide to Living in the Capital , Cairo , Egypt

تسوق

للبنات: 5 محلات تشتري منهم شنط وأحذية مميزة للعيد

للبنات: 5 محلات تشتري منهم شنط وأحذية مميزة للعيد
بواسطة
Dina Mokhtar

من الحاجات اللي ما حدش يقدر ينكرها مهما كبر في السن هو أن لبس حاجة جديدة أول يوم العيد بيفرق، وبغض النظر عن أن كل ما الواحد بيكبر كل ما سعر الحاجة بيزيد وبالتالي عدد القطع الجديدة بينقص في طقم العيد، إلا أن ده ما يمنعش أنك ممكن تشوفي نفسك بحاجة من الحاجات اللي موجودة في المحلات دي قبل دخلة العيد… بس ننصحك تلحقي لأن ده موسم بالنسبة لناس كثير والموضوع بيبقى جحيم في أماكن القياس.

برضه هتلاقي هنا أماكن تقدري تلاقي فيهم شنط وأحذية وحاولنا قدر الإمكان أننا نجيب أسعار: 

                           

بارفوا – Parfois:

من الأماكن اللي بتجمع كل الإكسسوارات اللي ممكن تحتاجيها تحت سقف واحد؛ من أول الشنط والأحذية لحد الشيلان والإكسسوارات، وحتى إكسسوارات الشعر والساعات. وبالرغم من أن مش دائمًا بتبقى الأسعار في اللذيذ، إلا أن في آخر زيارة لنا هناك –من أسبوع بالظبط – بارفوا كان عامل تخفيضات على عدد كبير من الإكسسوارات (خواتم – حلقان –  وسلاسل) أسعارها بتبدأ من 29 جنيه لحد 79 جنيه، ده غير مجموعة شيلان أسعارها بتبدأ من 120 جنيه.

صحيح الشنط أسعارها ممكن تعتبر غالية حبتين بس عن تجربة بارفوا شنطه بتعيش وبتستحمل -الأسعار بتبدأ من 129 لحد 549 حسب الحجم والموديل. لو عايزة تاخدي فكرة بصي هنا، ودي صفحتهم على الفيسبوك… ممكن تحتاجيها.

 

بيكسي – Pixi:

من الأماكن اللي بتجمع ما بين الموديلات الحديثة والأسعار الهايلة اللي مش ممكن تلاقي مكان ثاني بيقدمها. بيكسي فروعه منتشرة في كل مكان في القاهرة من أول أكتوبر في مول العرب، المهندسين وحتى مصر الجديدة. صفحته على الفيسبوك على طول نازل فيها أحدث الموديلات، ده غير أنهم بيردوا على أي استفسارات لو عندك.

من ضمن المجموعة اللي صادفناها كانت مجموعة أحذية بتبدأ أسعارها من 179 وبتصل لحد 259 جنيه –حسب ما شوفنا. أما الشنط، صادفنا منهم واحد كاجوال كبيرة عليها نقوش هندسية بـ 189 جنيه، وواحدة فورمال أبيض في أزرق بـ 230 جنيه.

ولو ليكي في النظارات، بيكسي عندهم مجموعة من النظارات معروضة في فروعهم المختلفة.

 

بينكس – Pink’s:

بالرغم من أن مجموعة الأحذية مالهاش محلات خاصة بتعرض فيها، إلا أن ممكن تشتري من موقعهم، ده غير أنك ممكن تلاقي منتجاتهم في محلات زي فينتاج بوتيك – Vintage Boutique، تاج كونسيبت ستور –  Taj Concept Store و بوب أب شوب – Popup Shop.

وبما أن مجموعة الأحذية مصنوعة في أسبانيا؛ فهتلاقي الأسعار عندهم بتتراوح ما بين 749 و790 جنيه. ولكن المجموعة دي نازل عليها تخفيض 50% فهتلاقيهم بـ 374 و395 جنيه.

أما مجموعة الشباشب والصنادل المناسبة لجو الصيف فمنها أشكال وألوان ياما، وأسعارها بتبدأ من 299 جنيه ولحد 649 جنيه.

تقدري تاخدي فكرة برضه من صفحتهم على الفيسبوك.

 

إتش & إم  – H&M:

نرجع للبس شوية، وبما أننا بنحب الأماكن اللي ممكن تلاقي فيها كل الأذواق والأسعار خلينا نتكلم عن آخر مرة دخلنا فيها إتش & إم. فيه مجموعة كبيرة من القطع اللي أسعارها ممكن تناسب الجميع؛ يعني شوفنا مجموعة كيمونوز وكارديجانز –فيه منها طويل وبكم وبنص- أسعارهم من 199 جنيه لحد 379 جنيه. أما البنطالونات فمن  159 ولحد 499 جنيه حسب الموديل.

ده غير مجموعة التوبات اللي عنده منها أشكال وألوان كثيرة وأسعارهم من 159 لحد 399 جنيه، أكيد هتلاقي حاجة ليكي منها بس إلحقي لأنه لما بيتزحم ممكن تخافي على حياتك هناك.

 

بوهو جاليري – Boho Gallery:

سواء في فرع مصر الجديدة أو الزمالك، بوهو جاليري هتلاقي كل الجديد في الموضة؛ سواء شنط، ملابس أو إكسسوارات –وخصوصًا لو أنت من الناس اللي بيهتموا بالقطع اللي صممها شباب المصممين المصريين. أجمل حاجة أن بوهو جاليري بينزل صور لكل الجديد الموجود في المحل على الإنستاجرام، ولكن اللي موجود على موقعهم ما يجيش نقطة في بحر المعروضات الكثير اللي هتلاقيها في المحل.  ممكن تكون الأسعار أعلى من أي مكان ثاني ذكرناه في المقال، ولكن في المقابل القطع الموجودة في المحل مختلفة عن أي مكان تاني.  

مقترح