The Definitive Guide to Living in the Capital , Cairo , Egypt

في كل القصص الخيالية، بنشوف البطلات بفساتين جميلة. سندريلا وسنوايت وذات الرداء الأحمر وبطلة الجميلة والوحش، كل بطلة ليها فستان جميل بيميزها، وده علشان الفستان دائمًا حاجة بناتي جدًا.. ومهما تمردت البنت على الفستان ولبست ملابس مختلفة، بيفضل الفستات علامة مميزة للجمال، وده كان سبب في أن مي منصور، تقرر تشجع البنات على لبس الفساتين من تاني، وده عن طريق مشروع “بالتيكت”، اللي بيهدف لبيع الفساتين لمختلف البنات بأسعار مناسبة.

خلال السطور الجاية هنعرفكم أكتر على حكاية “بالتيكت”.

مي منصور هي أم وزوجة مجتهدة، طول الوقت كانت بتستغل أي مناسبة علشان تلبس فستان، لأنها بتشعر بحريتها وكيانها فيه، وكمان كانت بتسأل نفسها دايمًا لما تكون في مناسبة وتلاقي بنت مكتفة نفسها بلبس غير الفستان، “ليه؟!”، ليه البنت متلبسش فستان وتفرح، ليه البنت مرتبطة بأي لبس تاني غير الفستان رغم أن المناسبات هي أحلى فرصة لارتداء الفستان، ليه البنت بتخاف من أنها تلبس فستان في حياتها العادية، وليه أسعار الفساتين أغلى بكتير من أي لبس، ومن هنا قررت تبدأ فكرتها بأنها تعمل جروب مميز للبنات تبيع من خلاله فساتين جميلة بأسعار مناسبة.

الفكرة جت لمي أنها تطلق جروب “بالتيكت”، من منطلق أن نفسها البنات كلها تلبس فساتين، ورغم أنها مقتنعة أن كل اللبس جميل وكل البنات جميلات ولكن رؤيتها أن الفستان أحلى وأجمل ومريح أكتر.

كانت المشكلة إن صناعة فستان خاص أمر مكلف جدًا، ومن هنا قررت “مي” أنها تدور في “الاستوكات” الخاصة بالبراندات، بهدف إنها تقدر توفر للبنات موديلات حلوة ومميزة لكن بسعر رخيص، وبالفعل قدرت أنها تجيب كل الفستاين براندات وبالتيكت بتاعها وبأقل من ربع تمنها علشان تناسب كل الفئات.

بتبدأ أسعار الفساتين في جروب “بالتيكت” من 150 جنيه، لكن في أوقات معينة بتكون أرخص وبتوصل لـ 100 جنيه، وعلى الرغم من أن الفكرة وليدة وحديثة إلا أنها بدأت في الانتشار بين البنات بشكل واضح، وعملت صدى وبنات كتير بقوا يلبسوا فساتين، وبقى اسم مي منصور مرتبط بالفستان دايمًا.

يعني نقدر نقول إن “مي منصور” باختصار هي بنوتة مصرية مجتهدة قررت ترجع البنات للبس الفساتين تاني.

وعلشان تعرفوا أكتر عن الجروب والفساتين زوروا صفحتهم على فيسبوك من هنا.