من الأقل جودة للأفضل.. تقييمنا لـ5 مشروبات غازية مصرية في محلات القاهرة
أنواع مشروبات غازية مصرية بدائل بيبسي وكوكاكولا سوق المشروبات الغازية في مصر مشروبات غازية
Cairo 360
رنا شرف
رغم أنها غير صحية، لكن ماحدش يقدر ينكر إن المشروبات الغازية لها شعبية كبيرة، وكتير من المصريين بيحبوها خصوصًا بعد أي أكلة دسمة، وده بسبب أسطورة (غير حقيقية) بتقول إن المشروبات الغازية بتساعد على الهضم.
وفي محلات القاهرة كتير من المشروبات الغازية المشهورة وغير المشهورة، إحنا جربنا مؤخرًا 5 منتجات مصرية 100%، وفي السطور الجاية هنقول لكم تقييمنا لهم من الأقل جودة وحتى الأفضل. اتفضلوا معانا!
رقم 5 في التقييم “سينا كولا”
من حيث الطعم مش أفضل حاجة، وفيه منها عبوات بأطعمة كتير زي البرتقال والليمون والتفاح والكولا. سعرها رخيص جدًا، سعر اللتر 10 جنيه، فلو هتختار بناءً على السعر ومش مهم الجودة يبقى ده أرخص مشروب غازي ممكن تشتريه من محلات القاهرة لكن ماتتوقعش طعم يعجبك!
رقم 4 في التقييم “بيج كولا”
مشروب غازي طعمه مقبول إلى حد ما، وفيه منه أحجام صغيرة جدًا ولحد 2 لتر.
سعر البيج كولا الـ200 مللي أقل من 7 جنيه، وبتتميز بأنها موجودة في كثير من محلات القاهرة.
رقم 3 في التقييم “أويسس”
من الأنواع الجيدة واللي مش هتحس غير بفرق قليل بينها وبين الأنواع العالمية، وفيه منها عبوات بأطعمة مختلفة زي البطيخ والكولا والليمون وأكثر.
سعر العبوة الـ400 مللي 10 جنيه، ومؤخرًا أصبحت متوفرة بنسبة كبيرة في السوق.
رقم 2 في التقييم “سبيرو أسباتس”
منتج مميز، كان مظلوم، لأنه موجود من الستينيات لكن كتير ماكانوش واخدين بالهم منه. من حيث الطعم جيد جدًا، ومن حيث السعر فأسعاره مناسبة، بتبدأ من 8 جنيه، وأنواعه مختلفة، فيه منه بالعنب اليوناني والخوخ والكنتالوب، وحاليًا موجود في كل مكان.
رقم 1 في التقييم فيروز
يمكن هي مشروب شعير أكثر منها مشروب غازي، لكنها من أفضل المشروبات الغازية في محلات القاهرة من حيث الطعم والجودة. “فيروز” متوفرة بأنواع مختلفة زي التفاح والأناناس والكمثرى والتوت وأكثر، ومتوفرة في كل مكان في السوق بمعنى الكلمة.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
