The Definitive Guide to Living in the Capital , Cairo , Egypt

الصورة الرئيسية: Alexander Schimmeck

الصورة الداخلية: Desirae Hayes-Vitor

بعد غياب، رجعت ملكة الفواكه تتربع على عرشها من جديد! الإسماعيلية بتستعد لتنظيم مهرجان المانجو 2025 في نسخته التالتة، بداية من يوم الجمعة 8 أغسطس، وسط أجواء احتفالية هتجمع بين الطعم الحلو، الفن، والسياحة.

شارع محمد علي هينور

الانطلاقة هتكون من شارع محمد علي، الساعة 5:30 مساءً، بموكب احتفالي ضخم هيشارك فيه شباب وفنانين من أبناء الإسماعيلية، وكمان فرق فلكلورية هتقدم عروض موسيقية واستعراضية بتعكس جمال الثقافة المصرية.

لو بتحب المانجو، المهرجان هيكون جنتك! من “حديقة نمرة 6” اللي فيها سوق مفتوح بأسعار مميزة، لحد “مانجو بازار” في القرية الأوليمبية.. هتلاقي كل الأصناف اللي بتحبها، مع أماكن مظللة ونقط مياه ومشروبات علشان راحتك.

أكتر من احتفال.. دعم وسياحة كمان

المهرجان مش بس احتفالية صيف، لكنه كمان بيدعم السياحة والاقتصاد المحلي، من خلال جذب صناع محتوى سفر، وتنشيط الإشغالات الفندقية، وكمان بيشجع الزوار يروحوا مزارع المانجو، ويكتشفوا سحر المدينة ويشاركوا تجربتهم على فيسبوك من خلال هاشتاج #عيش_المهرجان.

ومش هننسلى طبعاً إنه في نسخة 2023، المهرجان نظم ملتقى تصديري حضره مستوردين وسفراء من أكتر من 25 دولة زي إنجلترا، كندا، كوريا، وفرنسا، علشان يفتحوا أسواق جديدة للمانجو المصري، بالتعاون مع جهات زي مجلس تصدير الحاصلات الزراعية، وUSAID.

وفي 2025 المحافظة اشتغلت على تحسين كل حاجة في التجربة: قللت إغلاق الشوارع، اختارت أماكن فيها ظل، وزعت هدايا من المانجو، نظمت فعاليات آمنة، شجعت فرق وفنانين من الإسماعيلية يشاركوا.

ليه الإسماعيلية؟

علشان ببساطة، هي عاصمة المانجو في مصر! عندها حوالي 118 ألف فدان مزروعة مانجو، بإنتاج سنوي يوصل لـ450 ألف طن. أشهر الأصناف: العويس، السكري، الزبدة، الكيت، النعومي.

ومن سبتمبر 2024 لحد يناير 2025، مصر صدرت 81 ألف طن مانجو طازج بقيمة 83 مليون دولار، وبدأ الطلب يزيد عليها في أوروبا، خاصة إسبانيا وفرنسا وإيطاليا.

تعرف المانجو وصلت مصر إزاي؟

الرواية الأشهر إن محمد علي باشا زرع أول شتلة مانجو سنة 1825 في قصر شبرا، ومنه انتشرت في المحافظات. فيه كمان رواية بتقول إن عرابي باشا جابها من سريلانكا سنة 1903 بعد ما رجع من المنفى. 

النهارده، مصر واحدة من أكتر الدول العربية والأفريقية إنتاجًا للمانجو، ومع مهرجان الإسماعيلية، الطعم الحلو بقى ليه موسم وذكريات.