نصائح عملية قبل النزول للتسوق في محلات ومولات القاهرة
التسوق في القاهرة اليوم العالمي لحقوق المستهلك مولات القاهرة نصائح قبل التسوق نصائح قبل النزول للمولات
Mohamed Talaat
يوم 15 مارس من كل سنة، بيحتفل العالم باليوم العالمي لحقوق المستهلك، وبالمناسبة دي، هنعرفكم على مجموعة نصائح عملية قبل ما تنزلوا تشتروا حاجة من محلات أو مولات القاهرة. جاهزين؟!
كتير مننا، بيحبوا ينزلوا المولات التجارية، خاصة في أوقات التخفيضات، بهدف شراء ملابس وأجهزة وغيرها من المستلزمات، ومؤخرًا نشر موقع “شوب يور وردروب” مجموعة نصائح مهمة لكل اللي ناوي ينزل يتسوق من المولات التجارية.
اكتب قائمة بالمشتريات
مهم جدًا تعمل قائمة بالحاجات اللي أنت فعلًا محتاج تشتريها من المحلات التجارية، سواء ملابس أو اكسسوارات أو أطعمة أو غيرها، علشان ماتنساش اللي أنت محتاجه وفي نفس الوقت علشان ماتشتريش حاجات مش محتاجها.
حدد ميزانيتك
مهم كمان تحدد ميزانية مالية للحاجات اللي أنت محتاجها من المحلات التجارية، علشان ماتتفاجئش بعد الشراء أنك صرفت كتير من مرتبك الشهري، وتلاقي نفسك مش قادر تكمل الشهر!
ادفع نقدًا وبلاش الفيزا
ننصحك تدفع نقدًا مش ببطاقة الائتمان، لأن ده هيخليك تحس أنك صرفت فلوس كتير، ودي حاجة مش هتحس بيها لو دفعت بالفيزا.
حدد وقت معين للتسوق
ماتسمحش لنفسك باللف كتير في المحلات التجارية المختلفة، علشان ماتلاقيش نفسك بتشتري حاجات كتير، علشان كده مهم تحدد لنفسك مدة معينة للتسوق وتلتزم بيها علشان ماتلاقيش نفسك تايه لوقت طويل في المحلات التجارية.
التسوق لوحدك أفضل
يفضل كمان تنزل المولات والمحلات لوحدك، علشان ماتلاقيش حد بيشجعك على شراء سلع كتير من المحلات التجارية ممكن تكون مش محتاجها.
أوعى تنزل المولات وأنت جعان!
بلاش تنزل تتسوق وأنت جعان أو حاسس بضيق وملل، لأن ده هيخليك تشتري سلع كتير سواء أطعمة أو ملابس وغيرها من أنواع البضائع المختلفة.
قدم شكوى لو اتعرضت للنصب
لما تتعرض للنصب من مكان تجاري، ننصحك تقدم شكوى لجهاز حماية المستهلك على الخط الساخن: 19588، ومؤخرًا أعلنت محافظة القاهرة كمان عن خط ساخن للإبلاغ عن أي مشاكل تتعلق بارتفاع الأسعار وهو الرقم: 15496.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
