هابي شم نسيم.. دليلك الكامل لأسعار الأسماك المملحة في القاهرة
أسعار الفسيخ والرنجة أكلات شم النسيم خروجة شم النسيم سعر الرنجة سعر الفسيخ شراء فسيخ ورنجة
Mohamed Talaat
الدنيا ربيع والجو بديع، قفل لي على كل المواضيع، ويلا نخرج نتفسح زي أيام زمان وناكل فسيخ ورنجة وملوحة وبيض ملون في الحدائق الجميلة اللي مالية القاهرة الكبرى. وعلشان شم النسيم دائمًا يوم مميز في مصر من أيام قدماء المصريين، فإحنا النهاردة هنعرفكم على أسعار الرنجة والفسيخ في سوق العاصمة المصرية، لأنهم طقس رئيسي في شم النسيم، وكمان في عيد الفطر كتير بياكلوا فسيخ ورنجة علشان الفرحة تبقى فرحتين.
السوق المصري لأول مرة من سنين طويلة فيه عجز بكميات الفسيخ والرنجة، والمعروض أقل بكتير من أي سنة فاتت، وللأسف من المحتمل الأسعار تزيد كل ما يقرب شم النسيم، لكن إحنا هنقول لكم على الأسعار في السوق لحد لحظة كتابة التقرير ده.
بيتراوح سعر الكيلو غير الجاهز للرنجة في السوق من 50 وحتى 75 جنيه.
وسعر الفسيخ بيتراوح ما بين 150 ولحد 200 جنيه.
وسعر الملوحة بيبدأ ما بين 90 وحتى 100 جنيه.
وسعر السردين بيبدأ من 35 جنيه.
أما المحلات اللي بتقدم الأسماك المملحة جاهزة الأسعار عندهم للفسيخ الجزل 750 جرام والمخلي 400 جرام، بيبدأ من 230 جنيه.
وسعر برطمان الملوحة الأسواني 750 جرام سعره 260 جنيه، و450 جرام بسعر 120 جنيه.
ولو بتحبوا البطارخ فالسنة دي البطارخ البلدي بيبدأ سعر الكيلو من 150 جنيه.
والفسيخ البوري بيبدأ سعره من 150 جنيه الكيلو.
وسعر الرنجة الهولندي بيبدأ من 70 جنيه.
وعلبة الفسيخ الفيليه 290 جنيه ووزنها 750 جرام، وسعر 400 جرام يبدأ من 130 جنيه.
كمان لو بتحبوا السردين فسعر الـ500 جرام 85 جنيه.
وعلبة الأنشوجة الفيليه 250 جرام بـ50 جنيه.
والرنجة الفيليه 500 جرام سعرها 58 جنيه.
أما برطمان البطارخ رنجة 350 جرام سعرها 52 جنيه.
برطمان فسيخ 200 جرام سعره 70 جنيه.
وبرطمان البطارخ البلدي 200 جرام 250 جنيه.
وسعر برطمان الفسيخ البوري المخلي 300 جرام 200 جنيه.
والفسيخ البوري جزل 400 جرام بـ200 جنيه.
والملوحة الأسواني لها نصيب كمان أكبر الفترة دي وفيه منها أنواع كتير، وسعر البركمان مهلي 300 جرام، 105 جنيه.
وسعر الملوحة البيبي 400 جرام 55 جنيه.
والسردين المغربي المخلي 400 جرام سعره 85 جنيه.
طبعًا الأنواع والأحجام كتير جدًا، ولكن إحنا جبنا لكم متوسط الأسعار، وطبعًا الأسعار ممكن تختلف مع اقتراب شم النسيم والعيد وقلة المعروض، فالأسعار دي استرشادية قابلة للتغيير.
وهابي شم نسيم على كل المصريين.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
