هتشتري بلاي ستيشن؟ خد بالك من شوية حاجات
playstation ألعاب ألعاب أونلاين ألعاب إلكترونية إزاي تشتري بلايستيشن تحميل ألعاب نصائح شراء بلاي ستيشن
Mohamed Hamdy
فيه فكرة غلط منتشرة بين ناس كتير أن البلاي ستيشن جهاز ألعاب للصغار في السن. لكن الفكرة دي مش سليمة وكل واحد جرب يلعب بلاي ستيشن عارف أنها غلط. والحقيقة أن الإقبال على شراء أجهزة بلاي ستيشن بيكون من الكبار والصغار على حد سواء. وخاصة في شهور الصيف. علشان كده هنقول لكم في الموضوع ده على بعض النصائح اللي لازم تاخدوا بالكم منها قبل شراء بلاي ستيشن.
الشراء من الخارج
بعض الناس بتشوف عروض مغرية وتخفيضات على سعر الأجهزة من خارج مصر. لكن في نفس الوقت بتخاف من عدم توافق الأجهزة دي مع التيار الكهربائي في مصر. لكن الحقيقة وعن تجربة أننا اشترينا بلاي ستيشن من أمريكا واشتغل في مصر تمام. لكن لازم تقروا الكتالوج كويس قبل التوصيل علشان تتأكدوا من توافق كهرباء الجهاز مع الكهرباء في مصر. كمان لازم تتأكدوا من Region الجهاز وهو رقم بيحدد مدى توافق الجهاز مع الألعاب اللي بيتم شرائها من كل دولة.
مستعمل ولا جديد؟
البعض بيجد عروض شراء بلاي ستيشن مستعمل بأسعار مغرية. وده بيخلي ناس كتير تسأل المستعمل أفضل أم الجديد؟ لو الميزانية تسمح لك تشتري جهاز جديد ما تترددش أبدا في الشراء. لكن لو عاوز تشتري مستعمل تجنب الشراء من التجار على قد ما تقدر، وحاول تشتري من الأقارب أو الأصحاب اللي تكون واثق في أمانتهم وطريقة استخدامهم للأجهزة.
شراء أسطوانات أم تحميل ألعاب؟
من أهم الأسئلة اللي هتصادفها: هل اشتري أسطوانة ألعاب أم أشتري الألعاب أونلاين وأحملها على الذاكرة الداخلية للبلاي ستيشن؟ لو مساحة الهارد ديسك الخاصة بالجهاز قليلة (500 جيجا مثلًا) بننصحك بالاعتماد على الاسطوانات. أما لو المساحة كبيرة (1 تيرا) أو تقدر توصل هارد خارجي بمساحة كبيرة ممكن في الحالة دي تحمل الألعاب من على الإنترنت لكن لازم نلفت نظرك لأن مساحة الألعاب بتكون كبيرة (أحيانًا بتقرب من 100 جيجا) بالتالي لازم يكون عندك اشتراك سريع في الإنترنت ومساحة تحميل كبيرة علشان ما تمرش بمواقف صعبة في التحميل.
أعدل الجهاز بتاعي ولا أسيبه بحالته؟
بعض الإعلانات على صفحات الفيس بوك والجروبات بتعمل عروض لتعديل أجهزة البلاي ستيشن بحيث يتم وضع ألعاب عليه بدون شرائها. والموضوع ده مش بننصح به أطلاقًا. أولًا لأن فيه اعتداء على حقوق الملكية الفكرية للشركات المصنعة للألعاب، وثانيًا علشان التعديل ده بيخلي الجهاز لا يقبل الدخول على الإنترنت أبدًا بالتالي هتخسر كل مميزات اللعب أونلاين أو حتى تحميل الألعاب المجانية والجديدة لما تنزل على الإنترنت.
ممكن أكسب فلوس من اللعب؟!
على الرغم من أن ناس كتير بتعتبر البلاي ستيشن مجرد تضييع للوقت، لكن فيه ناس بالفعل قدرت تحقق مبالغ مالية كبيرة من مجرد ممارسة الألعاب الالكترونية وتصوير لعبهم وبثه على مواقع الفيديو زي Youtube أو حتى المنصات المتخصصة في بث الألعاب أونلاين زي منصة twitch اللي بتعطي مبالغ مالية للاعبين مقابل بث لعبهم على الإنترنت وفقًا لعدد المتابعين لهم. ده غير مميزات تانية كتير لو كنت لاعب محترف وطريقة لعبك قوية ومختلفة.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
