The Definitive Guide to Living in the Capital , Cairo , Egypt

عيد الأضحى قرب، وكل الناس بتتجه لشراء الخرفان أكتر من العجول، لأسباب كتير أهمها السعر وسهولة كل حاجة من دبح ونقل وتقطيع للخروف عن العجل، واحنا في كايرو 360 هننصحكم بشوية حاجات علشان تقدروا تشتروا خروف صحي ومفيد

خروف العيد يفضل طبعًا أنك تشتريه من مزرعة علشان بيكون متغذي على أسس سليمة، خاصة أن الخرفان بتاعة الشارع بتبقى مربية كرش من الأكل السيء اللي بيصيبها بمشاكل كتير وبتوصل لتسمم اللحم.

هيئة الخدمات البيطرية أعلنت عن مواصفات خروف العيد وتمثلت في أنه لازم تتأكد أن مفيش تعاوير أو قطع بالأذن والذيل والجسم، ومش بيعرج ولا فيه طفيليات، وبلاش تشتري خروف كسول، دايمًا بص على المشاغب كتير الحركة، وبص على العينين اللي هتبقى لامعة ووردية لو الخروف نضيف ومفيش أي افرازات.

كمان تخلي بالك أن الصوف ملمسه ناعم ونضيف ومتماسك ومبيطلعش في الايد، ومغطي جسم الخروف كله، وخلي بالك ليكون مصاب بقروح جلدية، ولون أسنانه لبنية.

قطاع الإنتاج في وزارة الزراعة أعلنت انها هتطرح خرفان للبيع بسعر 60 جنيه للكيلو ويفضل تروح تشتري من هناك، وهيبقى متوافر في مشروعات جمعيات الإصلاح الزراعي، ومزارع معهد بحوث الإنتاج الحيواني، والإدارة المركزية للمحطات البحثية والتجارب الزراعية، والمركز الإقليمي للأغذية والاعلاف، ومشروعات قطاع استصلاح الأراضي، ومشروع دعم القدرات التسويقية لصغار المزارعين “برايم”.