The Definitive Guide to Living in the Capital , Cairo , Egypt

كثير جدًا من المشاركين في الأعمال العامة والأنشطة الطلابية بتبقى ناقصاهم في البداية خبرة الحركة، في حين أنهم بيكون عندهم حماسة شديدة وهمة عالية جدًا، فإما أنهم يلاقوا حد يستثمر الحماسة ويوجهها، أو يهبطوا مع الوقت بدون فائدة تذكر.. وبالتالي اللي هنحاول نعمله هنا هو تقديم مساعدة جزئية لهم:

بص يا سيدي.. من الحاجات اللي دايمًا بتبقى عاملة مشكلة في الإجابة على سؤال “إزاي”؟ في الأنشطة المشابهة هي أنك لو ما عرفتش تعمل اتفاق يخلي المهام بتاعتك تخلص على أيد جهة خارجية، هتفضل محتاج أنك تعملها بنفسك، فلازم تبقى عارف إزاي تعمل كده دايمًا علشان أوقات الزنقة ومواسم الزحمة، وإحنا هنا هنقسم الحاجات اللي بنتعب جدًا في توفيرها لو ما لاقيناش Sponsors نوعيين يوفروها، لأربع أقسام:

1. “اللوجيستيات” بأنواعها.

2. أماكن الاجتماعات.

3. أماكن إقامة الفعاليات المجمعة. 

أولًا: اللوجيستيات بأنواعها:

1- التي شيرتات:

الأماكن الأشهر في الأوساط دي:

شارع “كلوت بك” في العتبة، وده أشبه بسوق يعني، هتلاقي هناك أماكن كثير وأسعار مختلفة، ومتوفر في الشارع كمان مطابع للطباعة على التي شيرتات (أوفسيت).

وعندك اختيار ثاني بأنك تشتغل مع أحد جهات عمل التي شيرتات اللي بتخدم نفس أفكار نشاطك.. سواء ينتجوا لك بنفسهم أو يوصلوك بالأماكن اللي بيتعاملوا معاها.. تقدر تتعرف على الجهات دي وتتواصل معاها من خلال “دليل كايرو 360 لأماكن بيع تي شيرتات بتصميمات عربي“.

2- المطبوعات:

وتشمل الـ ID والـ Banners والـ Flyers وغيرهم.. ويلحق بهم كمان الـ “Pins” والدروع الزجاجية والخشبية اللي بتحتاجها في تكريم الأعضاء أو شكر الضيوف في الفعاليات الكبيرة، ودي هتلاقي سوقها في مكان من اثنين:

– أرض شريف، وشارع محمد علي في العتبة.

وفي شارع محمد على تحديدًا هتلاقي عدد كبير جدًا من الأماكن (كل خطوة تقريبًا) وأسعار متفاوتة إلى حد بعيد.. وإمكانية الفصال عالية.. وبالتالي هتحتاج ما تستعجلش وتأخذ وقتك علشان توصل للي أنت عاوزه.

– منطقة بين السرايات:

أمام بوابة تجارة جامعة القاهرة.. هتلاقي هناك أماكن كثير برضه.. بس عامل الوقت هنا مهم جدًا.. علشان طلبة الجامعة لكليات العمارة والفنون بيبقوا شغالين باستمرار هناك وبالتالي بيبقى فيه ضغط شديد على المطابع في وقت الدراسة.

3- مستلزمات الديكور:

عندك مكان من اثنين:

– حارة اليهود في العتبة وسوق الورق.

– مكتبة كاميرا ٩ آخر شارع المرور، بين السرايات.

الأسعار في حارة اليهود أرخص نسبيًا.. لكن الدنيا هناك زحمة ومتعبة شوية فمحتاجة حد صاحب طاقة وبال.

4- الـ “Notebooks” ومستلزمات الـ “Sessions”:

بالنسبة للـ “Notebooks” لو مش هتطبعها بنفسك في مكان من الأماكن اللي قلنا عليها مع المطبوعات، يبقى ممكن تشتريها جاهزة بكميات من شارع “الفجالة” في رمسيس، الحاجات بتتباع هناك بأسعار الجملة.. هي وبقية اللوازم زي الأقلام وخلافه.

ثانيًا: أماكن مناسبة للاجتماعات أو الـ Sessions:

هنا ييجي دور الـ Co-Working Spaces، تقدر تعرف عنها وعن أماكنها وكل التفاصيل اللي هـ تحتاجها من خلال “دليل كايرو 360 لمساحات العمل المشتركة في القاهرة“.

ثالثًا: قاعات ومسارح الـ Events:

ودي ممكن نقسمها لـ 3 أقسام:

1- أماكن حكومية أثرية، زي مثلًا:

– قصر الأمير طاز أو وكالة الغوري.. ودي أماكن أثرية مناسبة وجوها ساحر جدًا للفعاليات اللي محتاج فيها تبسط الناس وتوفر لهم جو مناسب للاستيعاب.

– درب 1718 في مصر القديمة، مجمع الأديان.

لكن مشكلة الأماكن اللي من النوع ده أن حجزها بيأخذ وقت ومجهود كون الأماكن دي تابعة لأكثر من جهة حكومية: صندوق التنمية الثقافية في الأوبرا، ووزارة الآثار، ووزارة الثقافة، وهتحتاج تشتغل على أخذ موافقات من كل الجهات المعنية قبل إقامة أي فعالية هناك.

2- أماكن حكومية عامة، زي مثلًا:

– مسرح وزارة الشباب في الزمالك، والتواصل بيكون مع وزارة الشباب مباشرة في الزمالك.

– قاعة سيد درويش في شارع خاتم المرسلين، الهرم.

– مسرح الهناجر، دار الأوبرا المصرية.

– مسرح الحضارة، دار الأوبرا المصرية (من أنسب الأماكن وأسهلها في الإجراءات، وسعته حوالي 250 فرد تقريبًا).

– قاعة مركز السموم في القصر العيني (عدد 120 فرد تقريبًا).

– قاعة المؤتمرات بكلية طب القصر العيني.

– قاعة الأزهر للمؤتمرات، مدينة نصر.

– مسرح السعيدية، الجيزة.

3- جهات خاصة، زي مثلًا:

– ساقية الصاوى، الزمالك، وده يعتبر مكان مثالي للفعاليات.

– قاعات المؤتمرات في النوادي أو المنشآت الاجتماعية الخاصة.

ربنا يجعلها سنة موفقة وناجحة ومفيدة للجميع!