The Definitive Guide to Living in the Capital , Cairo , Egypt

في رمضان مافيش سفرة في مصر مبيكونش عليها بلح رمضاني في الإفطار، وكمان فيه بعض الناس بيستخدموه في السحور، وسواء كان البلح أو التمر منقوع في مياه لوحده، أو باللبن، وحتى بالخشاف والقمر الدين، فلازم يكون موجود في أساس أي سفرة، والبلح والتمر في بلادنا كتير، بيتم زراعته على أراضي مصر وجودته ممتازة.

خلال السطور الجاية هنقول لكم على أهم أنواع البلح وأماكن زراعته في مصر.

البلح السكوتي، وهو بينتج من نخل عجوز، والبلح الأبريمي، وهو بلح بيتم تجفيفه بالشمس والأفران، والبلح الملكابي، اللي بيتميز أنه سكره متوازن وطعمه قوي، وبلح البرتمودا، وده من أفضل أنواع البلح وكمان أطول من المعتاد وجوانبه مش متشابهة ولون بيميل لقشر البرتقال الفاتح، وكل الأنواع دي بيتم زراعتها في محافظة أسوان.

أما أنواع زي أم الفراخ، اللي مشهورة بجودتها العالية وزفلول والعربي والحلاوي والسرجي والسيوي والصعيدي والعمري والعجلاني والحجازي الأبيض وصنف الأمهات، فدي أنواع بيتم زراعتها في الجيزة والفيوم والواحات.

وبالنسبة للزغلول والسماني بيكونوا موجودين أكتر في إدكو ورشيد والقناطر الخيرية، وبنت عيشة والحياني، بيتزرعوا في الإسكندرية ودمياط والقليوبية والبحيرة والشرقية، وكمان بلح طقطقت والبرحي فمنتشرين في واحة سيوة وتوشكى وشرق العوينات.

وفي الوادي الجديد  هتلاقوا أنواع بلح كتير زي “الصعيدي، البرحي، الحجازي، المجدول، المنتور، الفالق، العنبرة، والمشهور بتمر الملوك والصقمي”.

وبتشتهر مطروح بوجود أنواع كتير جدًا من البلح ومنها: البلح الصعيدى، الرطب، الغزالى، الفريحى، العزاوى، البشاير، الفريحي، الكعيبي، السكري، تطجت، أغرام مغزال، وغيرهم من الأنواع الكتير اللي بتنتجها مطروح.

رمضان كريم عليكم يا أهل مصر المحروسة.