The Definitive Guide to Living in the Capital , Cairo , Egypt

بما أن الصيف يحب الملابس القطنية قلنا نجمع لكم كام مكان تقدر تشتري منهم تي شيرتات قطن تواجه بيهم الأيام الصعبة اللي جاية. أحلى حاجة عجبتنا في المجموعة دي أن شكلهم وتصميماتهم مبتكرة عن التي شيرتات اللي ممكن تلاقيهم في أي مكان ثاني.

 

 

 

 

 

دوتس – Dots :

 

دوتس تي شيرتاته كلها 100% قطن مصري ممشط ومعالج بطريقة تخلي ملمس التي شيرت أنعم من التي شيرتات الثانية. التصميمات اللي بيقدمها مجموعة من الفنانين بتتنوع ما بين استخدام خط العربي لكتابة كلمات زي (الحب – الحياة – بحر)، أو شعارات بالإنجليزي. أخدنا بالنا أن دوتس عنده مجموعة تصميمات مختلفة عن أي مكان ثاني دورنا فيه وإحنا بنكتب المقال، وهي مجموعة التي شيرتات اللي عليها مشاهد خيالية متنوعة مرسومة ديجيتال، ده غير أنك لو بتحب سلسلة أفلام Star Wars هتنبسط جدًا؛ لأنهم عندهم مجموعة من التي شيرتات المستوحاة من الفيلم.  

عيبهم أن ما عندهمش تي شيرتات حريمي. بس مقاساتهم كثيرة من أول S  لحد XXL.

ندخل على المهم، سعر أي تي شيرت في دوتس 140 جنيه شاملة مصاريف الشحن، ده غير أنك ممكن تلاقيهم في فيرجين ميجا ستورز  سيتي ستارز ومول العرب.

كوتون بول – Cotton Ball:

 

هو صحيح كل تي شيرتاته سادة، إلا أن كوتون بول بيتميز بأنه عنده ألوان وقصات كثيرة ممكن تختار منها، ده غير أن فيه مجموعة كبيرة من التي شيرتات الحريمي كمان.  اللطيف أن كل تصميم بيحمل اسم محافظة من محافظات مصر، وطبعًا كل التي شيرتات مصنوعة من القطن المصري.

الأسعار كالآتي: كم طويل 135 جنيه، نص كم 125 جنيه وكت 95 جنيه، ده غير أن المحل عنده عرض ثابت لو اشتريت 3 تي شيرتات سعر الواحدة بيكون 100 جنيه. المقاسات من XS لحد XXL.

 كوتون بول له محل في الزمالك بس لو طلبت من صفحتهم على الفيسبوك (زائد مصاريف شحن) هتجيلك تي شيرتاتك لحد باب البيت.

زافير –  Zafir:

 

من أوائل الناس اللي نزلت تي شيرتات مكتوب عليها بالعربي، واللي جت فترة كل اللي نعرفهم تقريبًا كان عنده واحدة أو اثنين من عنده. تصميمات زفير بتتميز بروحها المصرية الساخرة، والمكان عنده مجموعة كبيرة ناجحة بين عدد كبير من الناس.

آخر مرة كنا هناك التي شيرت وصلت لـ 170 جنيه، واللي حسيناه سعر غالي حبيتين، بس ده ما يمنعش أنك تروح تشوف المحل الموجود في الزمالك، أو حتى تطل على صفحته على الفيسبوك.

ناس – Nas:

 

ناس بدأ بمجموعة من التي شيرتات اللي بتتباع في الأكشاك الموجودة في المولات، ودلوقتي ربنا فتح عليه وبقى له محل في سيتي ستارز بيعرض فيه من أول التي شيرتات لحد الشنط والـ Notebooks  وحتى البنطلونات الجينز.

بتصميمات معظمها عليها أمثال وشعارات مصرية، ناس عنده مجموعة رجالي وحريمي أسعارها كالآتي: 120 جنيه للتي شيرتات الحريمي، و115 جنيه للرجالي، أما البولو شيرتات فمنها رجالي بس بـ  135 جنيه.  ومقاساتهم من S لحد XXL. فيه كمان مجموعة للأطفال سعر التي شيرت الواحدة 80 جنيه. 

تقدر كمان تشتري من على موقع المحل الإلكتروني على الإنترنت، وكل شوية بينزل عروض على صفحة الفيسبوك، فتابع ناس علشان تشوف إيه الجديد.

تومبوكا – Tombokka:

 

تومبوكا بلا منازع هو أكثر اسم عنده تصميمات في المجموعة دي. لو أنت أول مرة تسمع عن تومبوكا، اسمح لنا نشرح لك فكرة الموقع إيه… تومبوكا عنده مجموعة كبيرة من الفنانين (أشهرهم جورج عزمي  وعمرو ثابت) اللي بيعرضوا تصاميمهم وبيختاروا إيه المنتجات اللي يتطبع عليه التصميم؛ تومبوكا مش بس بيبيع تي شيرتات، ده فيه ساعات حائط،Covers  للموبايل وشنط وحتى الخداديات.

سعر التي شيرت 180 جنيه -رجالي أو حريمي- وبكده يكون أغلى سعر موجود في المقالة، أما المقاسات فهي من S  لـ XL. وبما أنه موقع إلكتروني ومالوش محل فطبيعي أنك هتشتري أون لاين، ولكن ممكن تلاقي التي شيرتات في فيرجين ميجا ستورز سيتي ستارز ومول العرب.